अमेरिकामा एसाइलमका नयाँ आवेदकले वर्क परमिट नपाउने
अब अमेरिकामा एसाइलमका नयाँ आवेदकहरुले युएससीआईएसमा केस पेन्डिङ रहेको आधारमा वर्क परमिट नपाउने भएका छन् । १ सय ५० दिनसम्म पनि युएससीआईएसमा पेन्डिङ रहेको एसाइलमको आवेदनमा कुनै निर्णय प्राप्त नभएमा आवेदकले वर्क परमिटको आवेदन दिनसक्ने प्रावधान रहेको छ । तर अब युएससीआईएसले नयाँ आवेदकका हकमा आवेदन दिएको २१ दिनभित्र नै एसाइलम अन्तरवार्ताको मिति तय गर्ने भएको छ ।
एसाइलम अन्तरवार्ताको मिति कहिले आउने भन्ने निर्धारण २१ दिनभित्र गरेपछि तोकिएको मितिमा अन्तरवार्ता लिइनेछ । यसरी एसाइलमका नयाँ केसमा युएससीआईएसले १ सय ५० दिन नलगाउने भएपछि एसाइलम आवेदन दिने नयाँ आवेदकले युएससीआईएसमा एसाइलम पेन्डिङ रहेको आधारमा वर्क परमिट नपाउने भएका हुन् ।
युएससीआईएसले अन्तरवार्ताको मिति तय गर्दा अब आवेदन दिने नयाँ आवेदकलाई सबैभन्दा पहिले अन्तरवार्ताको मिति दिने भएको छ । वर्क परमिट प्राप्त गर्ने उद्देश्यलेमात्र एसाइलम फाइल गर्ने क्रम बढेपछि त्यसलाई दुरुत्साहन गर्न सरकारले नयाँ नीति बनाएको हो । अब नयाँ आवेदकलाई तुरुन्तै अन्तरवार्तामा बोलाएर योग्य भएमा एसाइलम स्वीकृत गर्ने र अयोग्य भएमा देशनिकालाको प्रकृयामा राख्ने जनाइएको छ । यसो गर्दा वास्तविक एसाइलमका लागि योग्य रहेकाहरुलाई फाइदा पुग्नेछ भने वर्क परमिटका लागि एसाइलमको दुरुपयोग गर्नेहरुले त्यस्तो दुरुपयोग गर्न पाउने छैनन् ।
