अमेरिकामा शरणार्थीका रुपमा आउन चाहनेमाथि सुरक्षा जाँचमा थप कडाई
प्रकाशित मिति : माघ १६, २०७४ मंगलबार
अमेरिकाको डिपार्टमेन्ट अफ होमल्याण्ड सेक्युरिटीले अमेरिकामा शरणार्थीका रुपमा आउन चाहनेमाथि सुरक्षा जाँचका नयाँ र कडा मापदण्डहरु तय गरेको छ । डिपार्टमेन्ट अफ होमल्याण्ड सेक्युरिटीका सेक्रेटरीले शरणार्थीका लागि थप सुरक्षा कडाईको घोषणा गरेका हुन् । अमेरिका यात्रा गर्न चाहनेहरुका लागि कडा सुरक्षा जाँच गर्ने नीति अनुशार नै शरणार्थी कार्यक्रमबारे नयाँ सुरक्षा मापदण्डहरु घोषणा गरिएको हो ।
शरणार्थी आगमनबाट अमेरिकाको सुरक्षा प्रणालीमा खतराबारे सम्बोधन गर्दै कार्यक्रम रद्द वा सुधार गर्ने निर्णय लिन डिपार्टमेन्ट अफ होमल्याण्ड सेक्युरिटीका सेक्रेटरीलाई दिइएको ९० दिनको पुनरावलोकन अवधिपछि उनले यस्तो निर्णय लिएका हुन् । ९० दिनको अवधिमा डिपार्टमेन्ट अफ होमल्याण्ड सेक्युरिटीले विभिन्न विभाग र एजेन्सीसँग समन्वय गरी शरणार्थी सुरक्षा कार्यक्रमबारे पुनरावलोकन गरेको हो ।
थप सुरक्षा जाँचमा जोखिमपूर्ण देशबाट आएका निश्चित व्यक्तिलाई अझ कडा सुरक्षा जाँच गर्ने र बेलाबेलामा थप पुनरावलोकन गर्दै जाने लगायतका विषयहरु उल्लेख छ । विगतमा अमेरिकाको शरणार्थी कार्यक्रम स्थगितपछि गत अक्टोबर २४ बाट थप सुरक्षा जाँचका मापदण्ड तय गर्दै सुचारु गरिएको थियो ।