१८ लाख कागजपत्रविहिनलाई नागरिकताको बाटोमा लैजाने प्रस्तावको तयारीमा ह्वाइटहाउस
प्रकाशित मिति : माघ ११, २०७४ बिहीबार
ह्वाइट हाउसले डाकाबाट प्रभावित लगायतका कागजपत्रविहिनलाई समेट्नेगरी सदनमा अध्यागमन सुधारबारेको योजना लैजाने तयारी गरेको छ । बाल्यकालमा अमेरिका आएका झण्डै १८ लाखलाई समेट्नुपर्ने डेमोक्र्याटहरुको मागलाई सम्बोधन गर्ने गरी ह्वाइट हाउसले यस्तो योजना बनाएको हो ।
डाका कार्यक्रमले समेटेका झण्डै ७ लाख कागजपत्रविहिन र थप गरी १८ लाख कागजपत्रविहिनहरुलाई अमेरिकी नागरिकताको बाटोमा लैजाने गरी अध्यागमन सुधारको योजना ल्याउन लागिएको हो । तर यसको बदलामा सिमाक्षेत्रमा पर्खाल लगाउने ट्रम्पको योजना कार्यान्वयनका लागि २५ बिलियन डलर निकाशा गर्ने योजनामा डेमोक्र्याटहरुले समर्थन गर्नुपर्नेछ ।
ह्वाइट हाउसका सल्लाहकार स्टेफन मिलरले बिहिबार यसबारे एकपेजको रुपरेखा तयार पारेका छन् । ह्वाइटहाउसको यो योजनाबारे विभिन्न प्रतिकृयाहरु आउन थालिसकेका छन् । अध्यागमन सुधारबारेको रुपरेखामा डिभी लोटरी अन्त्य गर्ने विषय पनि समेटिएको छ ।
त्यस्तै दाजुभाईदिदीबहिनी लगायत टाढाका नातेदारहरुलाई ग्रिनकार्ड स्पोन्सर गर्नसक्ने प्रावधान खारेज पनि ह्वाइटको अध्यागमनको योजनामा रहेको छ । जसअन्तरगत अमेरिकी ग्रिनकार्ड वा नागरिकताप्राप्त व्यक्तिले नजिकका व्यक्तिलाईमात्र स्पोन्सर गर्न सक्नेछन् । तर पहिले फाइल गरिएका आवेदनहरु भने प्रकृयामा लगिने जनाइएको छ । यसको बदलामा डेमोक्र्याटहरुलाई खुशी पार्न बाल्यकालमा अमेरिकामा आएका १८ लाख कागजपत्रविहिनहरुलाई नागरिकताको बाटोमा लैजाने प्रावधान समेटिनेछ । जुन डाकाबाट संरक्षित ७ लाख भन्दा दोब्बर संख्या हो ।