अमेरिका आउनेका विद्युतीय उपकरण जाँच तीब्र पार्न नयाँ निर्देशिका, सम्पर्क नम्बर र सन्देश हेर्न सक्ने
अमेरिकी विमानस्थल वा पोर्ट अफ इन्ट्रीबाट अमेरिका आउनेहरुका मोबाइल लगायत विद्युतीय उपकरण चेकजाँच तीब्र पार्न युएस कस्टम एण्ड बोर्डर प्रोटेक्सनले नयाँ निर्देशिका जारी गरेको छ । केहीदिन अगाडि जारी निर्देशिकामा अमेरिका आउने यात्रुका मोबाइल, कम्प्युटर, ट्याबलेट, क्यामेरा, ड्राइभ, टेपहरु, मिडिया प्लेयर लगायतका विद्युतीय उपकरणहरु चेकजाँचको थप प्रकृया उल्लेख गरिएको छ ।
अमेरिकामा आउनेहरुका मोबाइल लगायतका विद्युतीय उपकरणमा रहेका तस्विर, भिडियो, एप्लिकेशनहरु लगायतका सफ्टवेयरहरु चेक गर्नसक्ने प्रावधान रहेको सीबीपीले जनाएको छ । आवश्यकता अनुशार अधिकारीले व्यक्तिका पासवर्ड राखिएका एप्लिकेशनहरु समेत पासवार्ड मागेर हेर्न सक्ने प्रावधान रहेको छ । विद्युतीय उपकरण चेकजाँचका क्रममा अधिकारीले व्यक्तिका सम्पर्क नम्बरहरु, पठाएका सन्देशहरु लगायत हेर्न सक्छन् ।
अमेरिका आउने व्यक्तिका विद्युतीय उपकरणमा आतंकबाद सम्बन्धित र राष्ट्रिय सुरक्षामा खतरा रहेको सामाग्री भए नभएको सुनिश्चित गर्न चेकजाँच तीब्र पार्न नयाँ निर्देशिका जारी गरिएको हो । त्यस्तै मानव वा नगद तस्करी, प्रतिबन्धित सामाग्रीहरुको ओसारपसार, बालबालिकाका यौनजन्य भिडियोहरु भए नभएको सुनिश्चित गर्न चेकजाँच गरिने जनाइएको छ । त्यो बाहेक आर्थिक अपराधसँग सम्बन्धित सामाग्रीहरु भए नभएको निक्र्यौल गर्न समेत चेकजाँच गरिने जनाईको छ । नयाँ निर्देशिकामा आधारभूत र गहन चेकजाँचका तरिका लगायत विभिन्न नियमहरु उल्लेख गरिएको छ ।
