विमानस्थल झडप हुँदा २० को मृत्यु
प्रकाशित मिति : माघ २, २०७४ मंगलबार
माघ २, त्रिपोली । लिबियाको राजधानीमा रहेको अन्तर्राष्ट्रिय विमानस्थलमा सोमबार लडाकुहरूले आक्रमण गरेपछि भएको झडपमा बीस जनाको मृत्यु भएको छ। जेलमा रहेका आफ्ना समर्थकहरूलाई छुटाउन भन्दै लडाकुले विमानस्थलमै आक्रमण गरेपछि सरकारी पक्ष र आक्रमणकारीबीच झडप भएको थियो।
आक्रमणबाट ६३ जना घाइते भएका छन्। मिटिगा विमानस्थलमा आक्रमण भएपछि विमानस्थल खाली गराइएको थियो। केन्द्रीय सरकारका स्वास्थ्यमन्त्रीले फेसबुकमार्फत शुरुमा नौजनाको मृत्यु भएको जानकारी दिएका थिए। मिटिगा विमानस्थल त्रिपोलीबाट पूर्वतर्फ पर्दछ। यो आम नागरिकले प्रयोग गर्ने अन्तर्राष्ट्रिय विमानस्थल हो। सन् २०१४ मध्यतिर विद्रोही लडाकुले आक्रमण गर्दा भएको झडपपछि उक्त विमानस्थल पूर्ण क्षतिग्रस्त भएको थियो।
उत्तर अफ्रिकी मुलुक लिबियामा लामो समय मोहमद कद्दाफीले शासन गरेका थिए। उनलाई अमेरिकाले अपदस्त गरेपछि लिबियामा अशान्ति मच्चिएको छ। झडपका क्रममा भएको गोलाबारीमा परी ५ वटा विमान प्रभावित भएका छन्। केही घाइतेको अवस्था गम्भीर भएको हुनाले मृतकको संख्या बढ्न सक्ने प्रहरीको अनुमान छ। एजेन्सी