कालिकोट घटनाको छानबिन गर्नु पर्छ – मन्त्री शाही


प्रकाशित मिति : पुस ८, २०७४ शनिबार

विनाविभागीय मन्त्री महेन्द्रबहादुर शाहीले शुक्रवार कालिकोटमा १ को मृत्यु र आधा दर्जन म्यादी प्रहरी घाइते भएको घटनाको छानबिन गर्न माग गरेका छन् ।

शनिबार एक विज्ञप्ति जारी गर्दै मन्त्री शाहीले घटनाको सत्यतथ्य छानबिन गरी दोषीमाथि कारबाही गर्न माग गरेका हुन् । साथै उनले मृतकको परिवारलाई राहत तथा घाइतेहरुको उपचारको व्यवस्था गर्नसमेत सरकारसमक्ष माग गरेका छन् । ‘यही पुस ७ गतेका दिन कालिकोट जिल्ला सदरमुकाममा म्यादी प्रहरी विवेक ऐडीको दुःखद् मृत्यु र आधा दर्जन जति घाइते भएको घटनाप्रति मेरो गम्भीर ध्यानाकर्षण भएको छ’, शाहीद्वारा जारी गरिएको विज्ञप्तिमा भनिएको छ, ‘ यो घटना घट्नै नपर्ने घटना हो । यसको कारण पत्ता लगाइ दोषीमाथि कारबाही गर्न माग गर्दछु ।’

आफ्नो तलब कटाइएको भन्दै कालिकोटका म्यादी प्रहरी आन्दोलनमा उत्रिएपछि शुक्रबार त्यहाँ तनाव भएको थियो । तनाव नियन्त्रणमा लिन प्रहरीले गोली चलाएपछि शान्नी त्रिवेणी गाउँपालिका–५ तिकुवाका १९ वर्षीय म्यादी प्रहरी विवेक ऐडीको ज्यान गएको थियो भने आधा दर्जन घाइते भएका छन् । प्रहरीले गोली नचलाएको दाबी गरेको छ ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com