कागजपत्रविहिनलाई काममा राख्ने रोजगारदातामाथि अध्यागमनको नजर
प्रकाशित मिति : पुस ४, २०७४ मंगलबार
अमेरिकी इमिग्रेशन एण्ड कस्टम इन्फोर्समेन्ट आइसले कागजपत्रविहिनलाई काममा लगाउने रोजगारदाताहरुलाई लक्ष्यित गरेर अनुसन्धान सुरु गरेको छ । टेनेसीको अमेरिकी अटोर्नी अफिस र इमिग्रेशन एण्ड कस्टम इन्फोर्समेन्ट आइसमार्फत संघीय सरकारले टेनेसीको एउटा कम्पनीमा २० जना कागजपत्रविहिनहरुले नक्कली कागजपत्र बनाएर काम गरेका पत्ता लगाएको हो । एजेन्सीमार्फत काममा राखिएका ती व्यक्तिहरु एक्स्पोडाइटर इन्टरनेशनल नामको कम्पनीमा कार्यरत थिए ।
आइसका अधिकारीले यो मामलालाई गम्भिरताका साथ हेरेको र कागजपत्रविहिनहरुलाई मेम्फिस अन्तर्राष्ट्रिय विमानस्थलको संवेदनशिल क्षेत्रहरुमा पनि पुगेको बताएका छन् । टेनेसीमा यस्ता प्रकारका आपराधिक गतिविधिबारे सन् २०१८ भर आफूहरुले कडा प्रकारको अनुसन्धान गर्ने टेनेसीको पश्चिम जिल्लाका युएस एटोर्नी माइकल डुनाभेन्टले जनाएका छन् । आफूहरुले काम गर्ने र काममा लगाउने दुबैमाथि निगरानी बढाउने उनले बताएका छन् ।
काम गर्ने कागजपत्रविहिनहरुले नक्कली वर्क परमिट बनाएर काम गरेको पत्ता लागेको हो । आइसले सन् २०१८ मा अन्य राज्यहरुमा पनि कागजपत्रविहिनहरुलाई काममा लगाउनेमाथि कारवाही तीब्र पार्ने जनाइएको छ ।