कोरियाली तनाव अन्त्य गर्न ट्रम्प–पुटिन सहमत
प्रकाशित मिति : पुस १, २०७४ शनिबार
पुस १, २०७४-कोरियाली द्वीपमा जारी तनाव अन्त्य गर्न अमेरिकी राष्ट्रपति डोनाल्ड ट्रम्पले उनका रूसी समकक्षी भ्लादिमिर पुटिनसँग टेलिफोन वार्ता गरेका छन् । अमेरिकी राष्ट्रपतिको कार्यालय ह्वाइटहाउसका अनुसार उनीहरूबीच वार्ता उत्तर कोरियाली परमाणु कार्यक्रमका कारण उत्पन्न तनाव अन्त्य गर्ने विषयमा वार्ता भएको हो ।
क्रेमलिनले जारी गरेको विज्ञप्तिमा भनिएको छ, ‘अमेरिकी पक्षको चाहनामा रूसी राष्ट्रपति पुटिन र अमेरिकी राष्ट्रपति ट्रम्पबीच कोरियाली द्वन्द्वका विषयमा छलफल भएको छ ।’ छलफलमा कोरियाली तनाव अन्त्य गर्न एकजुट हुने सहमति भएको जनाइएको छ ।
क्रेमलिनले दुई राष्ट्रपतिबीच अर्थतन्त्रका बारेमा पनि कुराकानी भएको जनाएको छ । गतबुधबार अमेरिकी विदेशमन्त्री रेक्स टिलरसनले अमेरिका बिनासर्त उत्तर कोरियासँग वार्ता गर्न तयार रहेको बताए पनि ह्वाइटहाउसले उत्तर कोरियाले भविष्यमा परमाणु हतियार नष्ट गर्ने सर्तमा मात्र वार्ता हुने प्रस्ट पारेको थियो ।
ह्वाइटहाउसका प्रवक्ताले ट्रम्पको उत्तर कोरियाप्रतिको दृष्टिकोणमा कुनै परिवर्तन नआएको जनाएको थियो । उसले उत्तर कोरियाका कारण जापान, चीन र दक्षिण कोरियामाथि मात्र नभई समग्र विश्वमै जोखिम बढेको दाबी गरेको छ । यसअघि, राष्ट्रसंघका राजनीतिक मामिला प्रमुख जेफ्री फेल्टमेनले उत्तर कोरियाली अधिकारीसँग उत्तर कोरिया वार्ताका लागि इच्छुक भए राष्ट्रसंघले सघाउने बताएका थिए । उनले उत्तर कोरियाली अधिकारीले कोरियाली प्रायद्वीपमा युद्ध रोक्न चाहेको बताएको जनाएका छन् । प्योङयाङमा उत्तर कोरिया र राष्ट्रसंघको सचिवालयका उच्च अधिकारीबीच ८ वर्षयता भएको पहिलो गम्भीर राजनीतिक वार्तामा उनीहरूले यस्तो धारणा प्रकट गरेको उनको भनाइ छ । प्योङयाङका अधिकारीले कुनै प्रतिबद्धता नजनाएको तर वार्तालाई निरन्तरता दिन सहमति जनाएको बताइएको छ ।
राष्ट्रसंघका उपमहासचिव फेल्टमेनले गएको डिसेम्बर ५ देखि चार दिन उत्तर कोरियाको भ्रमण गरेका थिए । त्यस क्रममा उनले उत्तर कोरियाली विदेशमन्त्री री योङ होसहितका उच्च अधिकारीसँग छलफल गरेका थिए ।
