थाइल्याण्डले नेपालको सामाजिक–आर्थिक उन्नतीमा सघाउन चाहेको स्पष्ट
प्रकाशित मिति : मंसिर २९, २०७४ शुक्रबार
नेपाल र थाइल्याण्डबीचको बहुआयमिक सम्बन्धलाई थप सुदृढ तुल्याउन दुवै मुलुकबीच सचिवस्तरमा स्थापना भएको संयुक्त आयोगको बैठक शीघ्र हुने अपेक्षा थाइ राजदूतले बताएका छन् ।
नेपाल विश्वसम्बन्ध परिषद्ले आज ललितपुरमा आयोजना गरेको ‘थाइल्याण्ड¬–नेपाल सम्बन्ध’ विषयक प्रवचनमा नेपालका लागि थाइल्याण्डका राजदूत भाकभत तान्सकुलले विविध कारणले विगत १३ वर्षयता संयुक्त आयोगको पाँचौं बैठक हुन नसकेको बताउँदै उक्त बैठक चाँडै हुने आशा व्यक्त गरे ।
नब्बे प्रतिशत बौद्धधर्मावलम्बी जनसंख्या रहेको थाइल्याण्डका जनताले बुद्धको पूजा गर्दासमेत ब्राम्हणबाट गणेश, शिव र विष्णुको पूजा गर्ने चलन रहेको रोचक प्रशंग सुनाउँदै उनले थाइल्याण्ड र नेपालमा हात जोडेर अभिवादन गर्ने समान परम्परा रहेको चर्चा गरेका छन् ।
गौतमबुद्धको जन्मभूमि लुम्बिनी थाइल्याण्डका नागरिकका लागि प्रमुख तीर्थस्थल बनेको बताउँदै उनले धार्मिक पर्यटन प्रवद्र्धनसँगै द्विपक्षीय दौत्य सम्बन्धलाई अझ सुदृढ तुल्याउन बल मिलेको वास्तविकता सुनाए।
सन् २०१६ मा ४० हजार नेपाली थाइल्याण्ड भ्रमणमा गएका र त्यहाँबाट पनि लगभग त्यति नै थाइ नागरिकले नेपाल भ्रमण गरेको जानकारी उनले दिएका छन् ।
कृषि प्रविधि, पर्यटन प्रवद्र्धन, प्रविधि हस्तान्तरणका माध्यमबाट थाइल्याण्डले नेपालको सामाजिक–आर्थिक उन्नयनमा सघाउन चाहेको स्पष्ट गर्दै राजदूत तान्सकुलले सफलतापूर्वक निर्वाचन सम्पन्न भएको र त्यसले राजनीतिक स्थायित्वसँगै विदेशी लगानी भित्रने वातावरण निर्माणमा मद्दत पुग्ने विश्वास व्यक्त गरे ।