अमेरिकी दूतावासअगाडि प्रदर्शन
प्रकाशित मिति : मंसिर २५, २०७४ सोमबार
मंसिर २५, २०७४-अमेरिकी राष्ट्रपति डोनाल्ड ट्रम्पले जेरुसेलमलाई इजरायलको राजधानीका रूपमा मान्यता दिएको विरोधमा लेबनानस्थित अमेरिकी दूतावासमा भएका प्रदर्शनमा हिंसात्मक झडपहरू भएका छन् ।
राजधानी बेरुतको उत्तरमा अमेरिकी दूतावासनजिकै सयौंको संख्यामा प्रदर्शनकारीले ट्रम्पको निर्णयको विरोध गरिरहेका छन् । बीबीसीका अनुसार प्रदर्शनकारीलाई भगाउन सुरक्षाकर्मीले अश्रुग्याँस र पानीको फोहोरा प्रहार गरेका छन् ।
स्थानीय सञ्चार माध्यमका अनुसार कपितय प्रदर्शनकारीले पर्खाल चढ्ने तथा दूतावासको हाताभित्र प्रवेश गर्ने प्रयास गरेपछि प्रहरीले बल प्रयोग गरेको हो । कालो कपडा र सेतो स्काफ लगाएका प्रदर्शनकारीले अमेरिकी राष्ट्रपति ट्रम्पका विरुद्ध नाराबाजी गरेका थिए ।
लेबनानका कम्युनिस्ट पार्टी नेता हन्ना घरिबले प्रदर्शनकारीलाई सम्बोधन गर्दै ‘अमेरिकीहरू प्यालेस्टिनीको शत्रु’ भएको बताए । प्रदर्शनकारीको एक समूहले ट्रम्पको पुत्ला जलाएका थिए ।
जेरुसेलमलाई गत बिहीबार राजधानीको मान्यता दिएलगत्तै ट्रम्पले इजरायलको तेलअभिभस्थित अमेरिकी दूतावास जेरुसेलम सार्ने निर्णय गरेका थिए । उक्त निर्णयको व्यापक भत्र्सना भएको छ । लेबनानमा ४५ हजार प्यालेस्टिनी शरणार्थीहरू छन् ।
अरब लिगले ट्रम्पको निर्णयको कडा शब्दमा निन्दा गर्दै अमेरिकाले ‘मध्यपूर्वमा आगोको ज्वाला थपेको’ आरोप लगाएको छ । उसले अमेरिकी कदमले ‘मध्यपूर्वमा जारी शान्ति पक्रिया धरापमा परेको’ जनाएको छ ।
त्यसैगरी, वेस्ट ब्यांक, गाजा स्ट्रिप र रमल्लाहमा चौथो दिन पनि झडपहरू भएका छन् । जेरुसेलममा इजरायली फौजले प्रदर्शनकारीको सामना गर्न हजारौंको संख्यामा सुरक्षाकर्मी परिचालन गरेको छ । झडपका क्रममा सयौं प्यालेस्टिनी प्रदर्शनकारी घाइते भएको अधिकारीले जनाएका छन् ।
जेरुसेलमप्रति लामो समय मौन रहेको अमेरिकाले बिहीबार जेरुसेलमलाई इजरायलको राजधानीका रूपमा मान्यता दिएपछि केही समय शान्त रहेको मध्यपूर्वमा हिंसा भड्किएको हो ।
अन्तर्राष्ट्रिय सञ्चार माध्यमका अनुसार ट्रम्पको निर्णयको विरोधमा इन्डोनेसियाको राजधानी जाकार्तास्थित अमेरिकी दूतावासअगाडि पनि प्रदर्शन गरेका छन् ।
इजरायली प्रधानमन्त्री बेन्जामिन नेतेन्याहुले फ्रेन्च राष्ट्रपति इम्यानुयल म्याक्रोंसँग भेटवार्ताका लागि पेरिस जाँदै छन् । उनले युरोपेली संघका मन्त्रीहरूलाई सोमबार भेट्दै छन् । त्यसैगरी जोर्डन, इजिप्ट, इराक, टर्की, ट्युनिसिया र इरान लगायतका देशमा पनि विरोध प्रदर्शन जारी रहेको रोयटर्सले जनाएको छ ।
इजरायलले जेरुसेलमलाई आफ्नो राजधानी दाबी गर्दै आएको छ । प्यालेस्टिनीहरूले सन् १९६७ युद्धपछि इजरायलले नियन्त्रणमा लिएको पूर्वी जेरुसेलमलाई भावी राजधानी बताउने गर्छन् ।
सुरुङ ध्वस्त पारेको दाबी
इजरायली रक्षा बल (आईडीएफ) ले हमास समूहले गाजाको मध्य क्षेत्रबाट इजरायल पुग्न सकिने गरी निर्माण गरेको सुरुङमार्ग आइतबार ध्वस्त गरेको जनाएको छ ।
आईडीएफका प्रवक्ता कर्नेल जोनाथन कनरिकसले सुरुङ पत्ता लगाई ध्वस्त पार्न आईडीएफले विकसित गरेको अत्याधुनिक पद्धतिको प्रयोग गरिएको जनाए । उक्त घटनामा हमास जिम्मेवार रहेको बताए पनि थप जानकारी दिएको छैन ।
दक्षिण इजरायलको सीमानजिक पर्ने गाजा क्षेत्र हमास समूहको नियन्त्रणमा छ । हमासले इजरायलको अस्तित्वलाई स्वीकार गर्दैन । हमास र इजरायलले पटकपटक युद्ध लडेका थिए । उनीहरूबीच पछिल्लो पटक २०१४ मा युद्ध भएको थियो । त्यसताका हमासले सुरुङ निर्माण गरेको थाहा पाएपछि अत्याधुनिक प्रविधिको विकास गरेको इजरायलको दाबी गरेको छ ।