संबिधान दिवस : सत्तापक्ष, प्रतिपक्ष र मधेसीले यसरी मनाए
प्रकाशित मिति : आश्विन ३, २०७३ सोमबार
सरकारले यसरी मनायो
नेपालको संविधान जारी भएको पहिलो वार्षिकोत्सवका अवसरमा सरकारले विशेष समारोह आयोजना गरेको । संविधानसभामार्फत एकवर्ष अघि आजकै दिन संविधान जारी भएको थियो । संविधान दिवस मूल समारोह समितिद्वारा नेपाली सैनिक मञ्च टुँडिखेलमा आयोजित समरोहमा राष्ट्रपति विद्यादेवी भण्डारी उपस्थिीत भइन् । कार्यक्रममा प्रधानमन्त्री पुष्पकमल दाहाल, प्रधानन्यायाधीश सुशीला कार्की, उपप्रधानमन्त्रीद्वय विमलेन्द्र निधि र कृष्णबहादुर महरा, मन्त्रीगण, सांसदहरु, तीनवटै सुरक्षा निकायका प्रमुख समारोहमा उपस्थिति थियो ।
नेपाली काँग्रेसका उपसभापति रामचन्द्र पौडेललगायत विभिन्न राजनीतिक दलका नेताको पनि सो समारोहमा उपस्थिति थियो । राष्ट्रपति भण्डारी समारोहस्थल उपस्थित हुँदा उनको सम्मानमा नेपाली सेनाले सम्मान गारथ अर्पण गरेको थियो । संविधान दिवस मूल समारोह समितिका अध्यक्ष एवम् प्रम दाहाल र गृहमन्त्रालयका सचिव लोकदर्शन रेग्मीले राष्ट्रपति भण्डारीलाई स्वागत गरेका थिए । नेपाली सेनाका दुईवटा हेलिकप्टरले पुष्पवृष्टि तथा संविधान दिवस–२०७३ लेखिएको ब्यानर समारोहमा प्रदर्शन गरेको थियो ।
समारोहमा नेपाली सेना, नेपाल प्रहरी, सशस्त्र प्रहरी बल, उपत्यकाका तीनवटै जिल्लाका जिविस तथा नगरपालिकाले सांस्कृतिक झाँकीसमेत प्रदर्शन गरेका थिए । राष्ट्रिय खेलकुद परिषद्का खेलाडीले देखाएको कला कौशल समारोहस्थल आकर्षण बनेको थियो । करिब दुई घन्टा अवधिको सो कार्यक्रममा तीनवटै सुरक्षा निकायले राष्ट्रिय भावनाले ओतप्रोत भएका सङ्गीत तथा नृत्यसमेत प्रदर्शन भएको थियो । संविधान दिवसका अवसरमा आज देशभर सार्वजनिक बिदासमेत दिइएको छ । आज विदेशमा रहेका नेपालीले पनि संविधान दिवस विविध कार्यक्रम आयोजना गर्दै मनाउँदै छन् ।
प्रतिपक्षको बेग्लै कार्यक्रम
प्रतिपक्ष एमालेले संबिधान दिवसको दिन बेग्लै कार्यक्रम गरेर मनाएको छ । काठमाडौं बसन्तपुरमा एमालेले विशेष कार्यक्रम सम्पन्न गरेको छ । कार्यक्रमलाई एमाले अध्यक्ष केपी ओली लगाएत शिर्ष नेताहरुले सम्बोधन गरेका थिए । ओलीले आफ्नो सरकारले स्थिरता कायम गरि चुनाव तथा विकासका कामका कार्यतालिका सार्वजनिक गरेको बेलामा अरुको लोभमा परि सरकार ढालिएको आरोप लगाएका छन् । संविधान दिवसको अवसरमा एमालेले काठमाडौंमा आयोजना गरेको कार्यक्रममा बोल्दै ओलीले दाहाल सरकार हरियो घाँस देखेर लोभिएको पाठोजस्तो भएको बताए । उनले भने, स्थिरता र विकासमा जान लागेको बेलामा लोभी पाठो खोजेर हरियो घाँस हाले । पाठोले देब्रे हातको घाँस देख्यो तर दाहिने हातको खुकुरी देखेन र घाँसको पछि पछि लाग्यो ।
त्यस्तो लोभले आफ्नो कार्यतालिका भत्किएको उनले दाबी गरे । यो सरकार बन्नेबित्तिकै छिमेकी देशमा गएर नेपाली जनताको भावना विपरित काम गरेको उनले आरोप लगाए । प्रधानमन्त्री बनेको भोलिपल्टै नाकाबन्दी कायम राख्न सकिएन भनेर विशेष दुत पठाएको हो रुु उनले प्रश्न गरे । ओलीले नेपालको संविधानको बारेमा भारतले चलाएको क्याम्पियनमा प्रधानमन्त्री दाहालले ुहसु भनेर ल्याप्चे ठोकेर आएको बताए । संविधानको सर्वस्वीकार्यको विषयमा उनले नेपालको ९२ प्रतिशत प्रतिनिधिको सहमतिमा भएको बताए ।
कार्यक्रममा एमालेका उपाध्यक्ष बामदेव गौतमले कसैले भन्दैमा नेपाल नटुक्रिने उल्लेख गर्दै संविधानको रक्षाको लागि नेपाली जनता लड्न तयार भएको बताए । सरकार परिवर्तनाबारे बामदेवको भनाई थियो, ‘सरकाको कमजोरी कहीँ थिएन, प्रचण्ड कमजोर बिन्दु थिए, त्यही प्रहार गरेर सरकार ढालिएको हो ।’
मधेशीको सांकेतिक ‘शव’ प्रदर्शन
संघीय गठबन्धनले सोमबार राजधानीका विभिन्न स्थानमा विरोध प्रदर्शन गरेको छ । रत्नपार्कको शान्तिबाटिका तथा माइतीघर मन्डलामा भेला भएका मधेसी मोर्चासहित गठबन्धनमा रहेका विभिन्न समूहले कालोझन्डा प्रदर्शन गर्दै संविधान दिवसको विरोध गरेका हुन् । उनीहरुले विरोधसभासमेत गरेका थिए ।
संविधान मधेश विरोधी रहेको भन्दै विरोध गर्दै आएका युवाहरुले काठमाडौंमा मधेशीहरुको सांकेतिक शव प्रदर्शन गरेका छन् । संविधान जारी भएको दिनको सम्झनामा आन्दोलनका क्रममा मधेशीहरुको हत्या गरिएको संकेतको रुपमा सांकेतिक शवहरु प्रदर्शन गरिएको छ । मधेशी समाजले काठमाडौंको माइती घर मण्डलामा बनाएर प्रदर्शन गरेको छ ।
कार्यक्रममा विश्लेषक सीके लालले नेपालको मृत संविधान धेरै दिन टिक्न नसक्ने बताएका थिए । मधेसी मोर्चा र संघिय गठबन्धनले काठमाडौं सहित मधेसका जिल्लाहरुमा कालो दिनका रुपमा आज विरोधका कार्यक्रमहरु आयोजना गरेका छन् ।
