अमेरिकाद्वारा आफ्ना नागरिकलाई इजरायल भ्रमणमा पुनर्विचार गर्न चेतावनी
Photo: Marat Badykov/ Unsplash
आतङ्कवाद र अशान्तिको खतरालाई मध्यनजर गर्दै अमेरिकी विदेश मन्त्रालयले आफ्ना नागरिकहरूलाई इजरायल भ्रमणको योजनामा पुनर्विचार गर्न आग्रह गरेको छ। मन्त्रालयले इजरायलका लागि तेस्रो स्तरको भ्रमण निर्देशिका पुनः जारी गरेको हो, यद्यपि कुल जोखिमको स्तरमा भने कुनै परिवर्तन गरिएको छैन।
अमेरिकी अधिकारीहरूका अनुसार इजरायलको सुरक्षा वातावरण जटिल रहेको र यो द्रुत गतिमा परिवर्तन हुन सक्छ। पूर्वसूचना बिना नै हिंसात्मक घटनाहरू घट्न सक्ने र क्षेत्रीय तनावका कारण एयरलाइन्सहरूले इजरायल उडान रद्द वा सीमित गर्न सक्ने चेतावनी दिइएको छ। सशस्त्र द्वन्द्वका कारण केही संवेदनशील क्षेत्रहरूलाई भने चौथो स्तरमा राखिएको छ।
नागरिकहरूलाई रुट ८५ देखि रुट ९० र रुट ८७ को उत्तरी क्षेत्र, गाजा स्ट्रिपको ७ माइलको परिधि तथा ताबा सीमा नाका बाहेक इजरायल-इजिप्ट सीमाको १.५ माइल क्षेत्रमा यात्रा नगर्न निर्देशन दिइएको छ।
इजरायलमा कार्यरत अमेरिकी सरकारी कर्मचारीहरूलाई पनि यी क्षेत्रहरूमा जान रोक लगाइएको छ। यद्यपि, अगस्ट २६ को नयाँ अद्यावधिक अनुसार कर्मचारीका परिवारका सदस्यहरूलाई भने उनीहरूसँगै बस्न जाने अनुमति दिइएको छ।
यदि कोही अमेरिकी नागरिक इजरायल भ्रमणमा जान्छन् भने उनीहरूलाई सजग रहन, भीडभाड र प्रदर्शनबाट टाढा रहन तथा स्थानीय सुरक्षा निकायको निर्देशन पालना गर्न भनिएको छ। साथै, आपतकालीन अवस्थामा मद्दतका लागि नजिकैको बम शेल्टरबारे जानकारी राख्न र अमेरिकी सरकारको सहायता बिना नै देश छाड्न सक्ने वैकल्पिक योजना तयार पार्न सल्लाह दिइएको छ।