बाढीपीडित नेपालीका लागि अमेरिकाद्वारा ५ लाख डलर सहयोग
नेपालको नुवाकोटमा बाढीबाट प्रभावित मानिसको उद्धार गर्दै उद्धारकर्मी। तस्बिर: दिपेन्द्र ढुंगाना/नेपयोर्क
अमेरिकाले नेपालको रसुवा जिल्लामा आएको विनाशकारी बाढीमा परी ज्यान गुमाएका व्यक्तिका परिवारप्रति समवेदना व्यक्त गर्दै प्रभावित समुदायका लागि ५ लाख अमेरिकी डलरको आपत्कालीन मानवीय सहायता उपलब्ध गराउने घोषणा गरेको छ।
अमेरिकी विदेश मन्त्रालयका अनुसार क्याथोलिक रिलिफ सर्भिसेससँगको विश्वव्यापी सहयोग कार्यक्रममार्फत उपलब्ध गराइने उक्त रकम बाढी प्रभावित क्षेत्रमा आपत्कालीन आश्रय, राहत सामग्री तथा खानेपानी, सरसफाइ र स्वच्छतासम्बन्धी सेवाका लागि प्रयोग गरिनेछ।
“नेपालको रसुवा जिल्लामा आएको विनाशकारी आकस्मिक बाढीमा ज्यान गुमाएका व्यक्तिका परिवार तथा आफन्तप्रति अमेरिका गहिरो समवेदना व्यक्त गर्दछ। यस विपत्तिबाट प्रभावित सबैप्रति हाम्रो सहानुभूति छ,” अमेरिकी विदेश मन्त्रालयले अगस्ट २६ मा जारी गरेको विज्ञप्तिमा भनेको छ।
अमेरिकी विदेश मन्त्रालयले बाढीपछिको अवस्थालाई नजिकबाट निगरानी गरिरहेको र राहत तथा उद्धार प्रयासमा सहयोग गर्न विपद् प्रतिकार्यसम्बन्धी सल्लाहकारलाई प्रभावित क्षेत्रमा पठाइरहेको जनाएको छ।
यसअघि अमेरिकी विदेशमन्त्री मार्को रुबियोले भोटेकोसी र त्रिशूली नदी प्रणालीमा आएको विनाशकारी आकस्मिक बाढीपछि नेपाललाई अमेरिकी सहयोग उपलब्ध गराउने प्रतिबद्धता व्यक्त गरेका थिए। उक्त बाढीमा बुधबार बेलुकासम्म कम्तीमा १४७ जनाको मृत्यु भएको छ भने ४७ अमेरिकी नागरिकसहित सयौँ यात्रु सम्पर्कविहीन रहेका छन्।
रुबियोले बाढीबाट भएको जनधनको क्षतिप्रति दुःख व्यक्त गर्दै नेपाललाई अमेरिकी सरकारबाट आवश्यक मानवीय सहयोग उपलब्ध गराउन तयार रहेको बताएका थिए।
“विनाशकारी बाढीपछि हामी नेपाली जनतासँग ऐक्यबद्धता व्यक्त गर्दै प्रार्थनामा एकजुट छौँ,” रुबियोले भनेका थिए। उनले अमेरिकी विदेश मन्त्रालय “नेपाल सरकारलाई आवश्यक मानवीय सहयोग उपलब्ध गराउन तयार रहेको” बताएका थिए।
अमेरिकी विदेशमन्त्रीको घोषणापछि काठमाडौंस्थित अमेरिकी दूतावासले पनि आपत्कालीन सूचना जारी गरेको थियो। दूतावासले रसुवा जिल्ला तथा तल्लो तटीय क्षेत्रमा बाढीले ठूलो क्षति पुर्याएको जनाएको थियो।
दूतावासका अधिकारीहरूले रसुवा, नुवाकोट, धादिङ, गोरखा, चितवन र तनहुँलगायत प्रभावित क्षेत्रमा रहेका अमेरिकी नागरिकको खोजी तथा सहयोगका लागि स्थानीय अधिकारीहरूसँग समन्वय गरिरहेको बताएका छन्।
“भोटेकोसी बाढीका कारण भएको जनधनको क्षति र विनाशबाट हामी अत्यन्त दुःखी छौँ। ज्यान गुमाएकाहरूका परिवार तथा आफन्तप्रति हामी हार्दिक समवेदना व्यक्त गर्दछौँ र यस विपत्तिबाट प्रभावित सबैप्रति हाम्रो सहानुभूति छ,” अमेरिकी दूतावासले भनेको छ।
भारतका लागि अमेरिकी राजदूत सर्जियो गोर ले पनि बाढीबाट प्रभावितप्रति समवेदना व्यक्त गर्दै प्रभावित क्षेत्रमा रहेका अमेरिकी नागरिकलाई आपत्कालीन सूचनासँग जोडिइरहन आग्रह गरेका छन्।
“विनाशकारी बाढीबाट प्रभावित नेपाली जनताप्रति मेरो हार्दिक समवेदना छ। आफ्ना प्रियजन गुमाएका परिवारहरूप्रति हाम्रो गहिरो सहानुभूति छ,” गोरले भनेका छन्। उनले अमेरिकी नागरिकलाई “नेपालस्थित अमेरिकी दूतावास” का सूचनाहरू पछ्याउन र “स्मार्ट ट्राभलर इन्रोलमेन्ट प्रोग्राम” मा आबद्ध हुन आग्रह गरेका छन्।
काठमाडौंको उत्तरतर्फ चीनसँग सीमा जोडिएको हिमाली जिल्ला रसुवा बाढी, पहिरो तथा अन्य मौसमजन्य विपद्को उच्च जोखिममा रहेको क्षेत्र हो। विशेषगरी नेपालको मनसुन अवधिमा यहाँ यस्ता विपद्को जोखिम बढ्ने गर्छ।
अमेरिकी विदेश मन्त्रालयले पछिल्लो बाढीबाट भएको क्षतिको विस्तृत विवरण वा अद्यावधिक मृतक संख्या भने सार्वजनिक गरेको छैन।
अमेरिकी विदेश मन्त्रालयका अनुसार काठमाडौंस्थित अमेरिकी दूतावासले प्रभावित क्षेत्रमा रहेका अमेरिकी नागरिकको खोजी तथा सहयोगका लागि स्थानीय अधिकारीहरूसँग सहकार्य गरिरहेको छ।
बाढीसम्बन्धी आपत्कालीन सहयोग आवश्यक पर्ने नेपालमा रहेका अमेरिकी नागरिकले दूतावासको अमेरिकी नागरिक सेवा एकाइसँग [email protected] मार्फत सम्पर्क गर्न सक्नेछन्।
अमेरिकी सरकारले प्रभावित क्षेत्रमा रहेका आफ्ना नागरिकलाई स्थानीय समाचारको निगरानी गर्न, स्थानीय अधिकारीका निर्देशन पालना गर्न तथा आपत्कालीन र सुरक्षा सूचनाका लागि स्मार्ट ट्राभलर इन्रोलमेन्ट प्रोग्राममा आबद्ध हुन आग्रह गरेको छ।
नेपालमा रहेका आफन्तका बारेमा जानकारी लिन चाहने अमेरिकी नागरिकले अमेरिका र क्यानडाबाट १–८८८–४०७–४७४७ तथा अन्य देशबाट १–२०२–५०१–४४४४ मा सम्पर्क गर्न सक्नेछन्।
अमेरिकाले सहायता घोषणा गरेको समय नेपालमा मनसुनजन्य विपद्बाट प्रभावित क्षेत्रहरूमा सरकारी निकाय तथा मानवीय सहायता संस्थाहरूले उद्धार, राहत र पुनःस्थापनाका प्रयास अघि बढाइरहेका छन्।