केन्टकीमा १६७ मिलियन डलरको पावरबल जितेका व्यक्ति ४ पटक पक्राउ
(फोटोः स्कट काउन्टी प्रहरी विभाग)
केन्टकी राज्यको इतिहासकै सबैभन्दा ठूलो १६ करोड ७३ लाख अमेरिकी डलरको पावरबल जितेका एक व्यक्ति पुरस्कार दाबी गरेयता चौथो पटक पक्राउ परेका छन्। ५१ वर्षीय जेम्स फार्थिङलाई घरेलु हिंसाको गम्भीर आरोपमा आइतबार प्रहरीले नियन्त्रणमा लिएको हो।
जर्जटाउन निवासी फार्थिङलाई बोटिङ ट्रिपबाट फर्किएपछि एक महिलाको घाँटी थिचेको आरोपमा स्कट काउन्टी जेलमा राखिएको छ। पीडित महिलाले प्रहरीलाई दिएको बयान अनुसार, दुवै जना घर फर्किएपछि विवाद भएको थियो। त्यसक्रममा फार्थिङले दुवै हातले महिलाको घाँटी थिचेर सास फेर्न गाह्रो बनाएका थिए।
अदालतको अनलाइन विवरण अनुसार, उनलाई पहिलो डिग्रीको घाँटी थिचाइ र चौथो डिग्रीको कुटपिट घरेलु हिंसाबाट सामान्य चोटपटकको आरोप लगाइएको छ।
स्कट काउन्टी जिल्ला अदालतमा मङ्गलबार उपस्थित गराउँदा फार्थिङले आफू निर्दोष रहेको दाबी गरे। न्यायाधीशले उनको जमानत रकम १५,००० डलर तोकेका छन् र पीडित महिलालाई कुनै पनि माध्यमबाट सम्पर्क नगर्न आदेश दिएका छन्। साथै, आदेश उल्लङ्घन गरेमा प्रहरीलाई तुरुन्तै जानकारी दिने विद्युतीय निगरानी यन्त्र लगाउनुपर्ने व्यवस्था गरिएको छ।
फार्थिङले अप्रिल २०२५ मा जर्जटाउनबाट २ डलरको पावरबल टिकट किनेर ऐतिहासिक सफलता हासिल गरेका थिए। उनले आफ्नो जितको रकम आमा लिन्डा ग्रिजलीसँग आधा-आधा बाढ्ने घोषणा गरेपछि चर्चामा आएका थिए। तर, पुरस्कार जितेको केही दिनमै उनको आपराधिक शृङ्खला सुरु भयो।
फार्थिङले लटरी जितेलगत्तै मे २०२५ मा फ्लोरिडाको एक बीच रिसोर्टमा पहिलो पटक प्रहरीको सामना गर्नुपरेको थियो। त्यहाँ भएको एउटा झगडा साम्य पार्न पुगेका प्रहरी अधिकारीको अनुहारमा गोडाले हानेपछि उनलाई तत्काल नियन्त्रणमा लिइएको थियो। उक्त घटना पछि अदालतबाट समय बिताइसकेको मान्यता पाउनुका साथै जरिवाना तिरेर उनी छुटेका थिए।
त्यसपछि फेब्रुअरी २०२६ मा जर्जटाउनमा उनी दोस्रो पटक पक्राउ परे। एक महिलाले आफ्नो ज्यानको खतरा रहेको भन्दै आकस्मिक सेवा ९११ मा फोन गरेपछि प्रहरी घटनास्थल पुगेको थियो। प्रहरीले ती महिलालाई एउटा दराजमुनि लुकेर बसिरहेको अवस्थामा उद्धार गर्यो। अनुसन्धानका क्रममा प्रहरीले उक्त घरबाट हतियार, गोलीगट्टा, गाँजा र लागुऔषधका सामानहरू समेत बरामद गरेको थियो।
त्यसको एक महिना नबित्दै मार्च २०२६ मा उनी तेस्रो पटक कानूनी फन्दामा परे। लेक्सिङटनको एक घरमा अवैध रूपमा प्रवेश गरी करिब १२,००० डलर नगद चोरी गरेको दृश्य सिसीटिभी फुटेजमा कैद भएपछि प्रहरीले उनलाई तेस्रो पटक पक्राउ गरी हिरासतमा पठाएको थियो।
फार्थिङको आपराधिक रेकर्ड सन् १९९४ देखिकै रहेको छ। उनीमाथि यसअघि पनि चोरी, लागुऔषध, सङ्गठित अपराध र हिरासतबाट भागेको जस्ता गम्भीर आरोपहरूमा विभिन्न काउन्टीहरूमा मुद्दा चल्दै आएको थियो।
केन्टकी लटरीको नियम अनुसार, १८ वर्ष वा सोभन्दा माथिका जोकोहीले पनि टिकट किन्न पाउँछन्। प्यारोल वा प्रोबेसनको सर्तले रोक नलगाएसम्म आपराधिक पृष्ठभूमि भएका व्यक्तिहरूलाई पनि लटरी खेल्न र जित्न कानूनी छुट रहेको छ।