इरान युद्धमा अमेरिकी खर्च ३७.५ अर्ब डलर, ट्रम्प प्रशासनद्वारा थप बजेटको माग
अमेरिकी रक्षामन्त्री पीट हेगसेथ । तस्बिर : रासस/ एपी
अमेरिकी रक्षा मन्त्री पिटर हेगसेथले मङ्गलबार आयोजित सिनेट विनियोजन समितिको सुनुवाइमा इरान युद्धमा हालसम्म करिब ३७.५ अर्ब अमेरिकी डलर खर्च भएको जानकारी दिएका छन्। आगामी महिनाहरूमा सैन्य कारबाही जारी राख्न ट्रम्प प्रशासनलाई यो रकमको झण्डै दोब्बर बजेट आवश्यक पर्ने उनले बताएका छन्।
रक्षा मन्त्रालयले आगामी सैन्य अभियान सञ्चालनका लागि अमेरिकी कंग्रेससँग थप ६७ अर्ब डलरको पूरक बजेट माग गरेको छ। यसअघि चालू महिनाको सुरुमा कानुननिर्माताहरूसामु प्रस्तुत गरिएको ३० अर्ब डलरको अनुमानित खर्च बढेर अहिले ३७.५ अर्ब डलर पुगेको हो।
क्षतिग्रस्त अमेरिकी सैन्य बेसहरूको मर्मत, नष्ट भएका विमानको प्रतिस्थापन र हतियार भण्डारको पुनरापूर्तिसहित युद्धको कुल खर्च ८० देखि १०० अर्ब डलरसम्म पुग्ने पेन्टागनको आन्तरिक आकलन छ।
पेन्टागनका कार्यवाहक नियन्त्रकले यो खर्च विवरण अप्रिल महिनायता अद्यावधिक नगरिएको र यसमा गोलाबारुद पुनरापूर्तिको खर्च समावेश गरिए पनि सैन्य बेस पुनर्निर्माणको लागत नसमेटिएको सांसदहरूलाई स्पष्ट पारेका छन्।
यसैगरी, रक्षा मन्त्री हेगसेथले आफ्नो अनुमानमा आर्थिक वर्षको अन्त्यसम्मका लागि तलब, सञ्चालन, मर्मतसम्भार र अन्य सम्भावित खर्चहरू समावेश गरिएको बताएका छन्।
गत अप्रिलमा भएको युद्धविराम सम्झौता भङ्ग भएसँगै इरान युद्ध पुनः चर्किएको छ। हालै तीन जना अमेरिकी सैन्य कर्मी मारिएपछि राष्ट्रपति डोनाल्ड ट्रम्पले कडा जवाफी कारबाही जारी राख्ने प्रतिबद्धता जनाएका छन्।
रणनीतिक रूपमा महत्त्वपूर्ण जलमार्ग ‘स्ट्रेट अफ हर्मुज’ मा इरानी सेनाको बढ्दो आक्रमण र अमेरिकी नौसेनाको नाकाबन्दीका कारण व्यापारिक जहाजको आवतजावत ठप्पप्रायः बनेको छ।
उता, राष्ट्रपति ट्रम्पले युद्ध अमेरिकाले जितिसकेको दाबी गर्दै आए पनि मैदानमा कुनै प्रगति नदेखिएको भन्दै डेमोक्र्याटिक सिनेटरहरूले सुनुवाइका क्रममा रक्षा मन्त्री हेगसेथमाथि कडा प्रश्न उठाएका थिए।