अमेरिकामा साढे ३ लाखभन्दा बढी विदेशी श्रमिकको ‘टिपीएस’ खारेज हुँदै, रोजगारदाताहरूलाई कामबाट हटाउन निर्देशन
प्रकाशित मिति : २६ असार २०८३, शुक्रबार
डिपार्टमेन्ट अफ होमल्याण्ड सेक्युरिटीले रोजगारदाताहरूलाई आउँदा हप्ताहरूमा साढे तीन लाखभन्दा बढी विदेशी श्रमिकहरूलाई कामबाट हटाउन निर्देशन दिएको छ। ट्रम्प प्रशासनले मानवीय सहायता अन्तर्गत उपलब्ध गराउँदै आएको टीपीएस कार्यक्रमलाई खारेज गर्ने तयारी गरेसँगै यो कदम चालिएको हो।
युएससीआईएसद्वारा जारी सूचना अनुसार, हाइटीका नागरिकहरूको वर्क पर्मिट जुलाई २४ मा समाप्त हुनेछ। यसैगरी इथियोपिया, म्यानमार, सोमालिया, दक्षिण सुडान, सिरिया र यमनका नागरिकहरूको कार्य अनुमति जुलाई १७ देखि खारेज हुनेछ।
सर्वोच्च अदालतले गत महिना ट्रम्प प्रशासनको पक्षमा ६-३ को बहुमतले फैसला सुनाउँदै हाइटी र सिरियाका टिपीएस धारकहरूको कानुनी संरक्षण अन्त्य गर्ने सरकारको अधिकारलाई सदर गरेको थियो। यो फैसला कार्यान्वयनमा आएसँगै ती देशका नागरिकहरूलाई अमेरिकाबाट देशनिकाला गर्न बाटो खुल्नेछ। हाल अमेरिकामा ३ लाख ३० हजारभन्दा बढी हाइटीका र ६ हजार १ सयभन्दा बढी सिरियाली नागरिक यस कार्यक्रम अन्तर्गत बसोबास गरिरहेका छन्। बाँकी पाँच देशका गरी थप २०,००० नागरिक यस निर्णयबाट प्रभावित हुनेछन्।
युएससीआईएसले कार्य अनुमतिको म्याद पटक-पटक थोरै समयका लागि मात्र थप्दै आएकाले रोजगारदाता र श्रमिकहरूमाझ ठूलो अन्योल सिर्जना भएको छ। कतिपय रोजगारदाताहरूले कानुनी कारबाही र जरिवानाको डरले आफ्ना कामदारहरूलाई समय अगावै जागिरबाट निकालिसकेका छन् भने कतिपयले अझै अलमलमै राखेका छन्।
अधिवक्ताहरूका अनुसार हाइटीका हजारौँ टिपीएस विजेताहरू अमेरिकाको स्वास्थ्य क्षेत्र, वृद्धवृद्धाको हेरचाह, उत्पादन, निर्माण र यातायात क्षेत्रमा कार्यरत छन्। उनीहरूलाई एक्कासि हटाउँदा अमेरिकी व्यवसायहरूमा समेत धक्का लाग्ने अनुमान गरिएको छ।
सन् १९९० देखि सुरु भएको टिपीएस कार्यक्रमलाई ट्रम्प प्रशासनले अस्थायी नभई स्थायी आप्रवासन संयन्त्र बनेको आरोप लगाउँदै आएको छ। यता आप्रवासी अधिकारवादीहरूले भने सुडान, सोमालिया र यमन जस्ता देशहरू अझै पनि गृहयुद्ध, कमजोर पूर्वाधार र अनिकालबाट ग्रसित रहेकाले त्यहाँ नागरिकहरूलाई फिर्ता पठाउनु अमानवीय हुने भन्दै सरकारको आलोचना गरेका छन्। यसैबीच, आगामी सेप्टेम्बर महिनाको सुरुमा एल् साल्भाडोरका करिब २ लाख नागरिकको टिपीएस संरक्षण पनि समाप्त गरिने व्यापक अनुमान गरिएको छ।