इबोला रोकथामका लागि अमेरिकाद्वारा नयाँ यात्रा नियम: कङ्गो भ्रमण नगरेको घोषणापत्र अनिवार्य
प्रकाशित मिति : ६ कार्तिक २०८३, शुक्रबार
विमानस्थलमा अमेरिकी सीबीपी अधिकारीद्वारा इबोला स्क्रिनिङ । तस्विर: डोनर बर्टन
इबोला भाइरसको संक्रमण फैलिन नदिन अमेरिकी सरकारले देश भित्रिने हवाई यात्रुहरूका लागि थप कडा प्रतिबन्ध लागू गर्ने भएको छ। एक सरकारी ज्ञापनपत्र अनुसार, अब अमेरिका यात्रा गर्ने सबै यात्रुले पछिल्लो २१ दिनमा डेमोक्रेटिक रिपब्लिक अफ कङ्गो भ्रमण नगरेको स्वघोषणा गर्नुपर्नेछ।
अमेरिकी रोग नियन्त्रण तथा रोकथाम केन्द्रले मे महिनामा कङ्गो भ्रमण गरेका यात्रुहरूलाई अमेरिका प्रवेशमा रोक लगाउने नियम ल्याएको थियो। जुलाई महिनामा यो नियम अमेरिकी नागरिकहरूका लागि पनि विस्तार गरिएको थियो।
सीडीसीको नयाँ आदेश नोभेम्बर ३ देखि लागू हुनेछ। यस आदेश अनुसार अमेरिका जाने सबै हवाई यात्रुले डिजिटल वा कागजी रूपमा घोषणापत्र बुझाउनुपर्नेछ।
युनाइटेड एयरलाइन्स, अमेरिकन एयरलाइन्स, साउथवेस्ट एयरलाइन्स र डेल्टा एयरलाइन्सको प्रतिनिधित्व गर्ने संस्था ‘एयरलाइन्स फर अमेरिका’ ले यस विषयमा तुरुन्तै कुनै प्रतिक्रिया दिएको छैन।सीडीसीले नयाँ नियम कसरी पालना गराउने भन्ने विषयमा छलफल गर्न शुक्रबार प्रमुख अमेरिकी तथा विदेशी एयरलाइन्सहरूसँग ब्रिफिङ बैठक आयोजना गर्दैछ।
इबोला नियन्त्रण प्रयासअन्तर्गत सीडीसीले यसै वर्षको सुरुदेखि युगान्डा वा दक्षिण सुडान भ्रमण गरेका विदेशी नागरिकहरूलाई पनि अमेरिका प्रवेशमा प्रतिबन्ध लगाएको छ।
मे महिनामा औपचारिक रूपमा महामारी घोषणा हुनुअघि ‘बन्डिबुग्यो’ प्रजातिको इबोला भाइरस महिनौंसम्म पत्ता नलागी फैलिएको थियो। यो भाइरसबाट संक्रमित हुनेमध्ये करिब आधा मानिसको मृत्यु हुने गर्छ र यसको हालसम्म कुनै स्वीकृत उपचार वा खोप छैन।
अफ्रिका सीडीसीका अनुसार, अफ्रिकामा यस महामारीका कारण हालसम्म करिब ४,७०० जनाको मृत्यु भइसकेको पुष्टि भएको छ। यद्यपि, यो महामारीसँग सम्बन्धित कुनै पनि इबोला केस अमेरिकामा हालसम्म दर्ता नभएको सीडीसीले जनाएको छ।