अमेरिकी नागरिकसँग विवाह गरी ग्रीन कार्ड आवेदन दिएको भोलिपल्टै मेक्सिकन गायक पक्राउ
प्रकाशित मिति : २५ असार २०८३, बिहिबार
फोटो: होमल्याण्ड सेक्युरिटी
आइसले एक २० वर्षीय मेक्सिकन मारियाची गायक हर्बर्ट कालेथ इबारा क्यास्ट्रोलाई नियन्त्रणमा लिएको छ। अमेरिकी नागरिकसँग विवाह गरेका इबाराले आफ्नो ग्रीन कार्डका लागि आवश्यक कानुनी कागजात दर्ता गराएको भोलिपल्टै उनलाई पक्राउ गरिएको कानुनी प्रतिनिधिहरूले जनाएका छन्।
यो घटनापछि टेक्सास क्षेत्रका डेमोक्रेटिक सांसद जोआकिन क्यास्ट्रोले इबाराको रिहाइका लागि जोडदार माग गरेका छन्। सांसद क्यास्ट्रोका अनुसार हिरासतमा रहेका बेला अध्यागमन केन्द्रका एक कर्मचारीले इबारालाई यदि तिमीले मेरो लागि गीत गायौ भने म तिमीलाई छोडिदिनेछु भन्दै दुर्व्यवहार समेत गरेका थिए। हिरासतमा रहेकै बेला जुलाई ४ का दिन इबाराले अमेरिकी राष्ट्रिय गान गाएको उनका वकिलले बताएका छन्।
बुधबार भएको कानुनी सुनुवाइमा अध्यागमन न्यायाधीशले इबाराको धरौटी स्वीकृत गरेका छन्। आवश्यक धरौटी रकम बुझाएपछि उनी आगामी केही दिनभित्रै रिहा हुने उनका वकिलले जानकारी दिएका छन्। इबारा ४ वर्षको उमेरमा मेक्सिकोको हिंसाबाट बच्न आफ्नो परिवारसँगै अमेरिका आएका थिए।
डोनाल्ड ट्रम्पको दोस्रो कार्यकाल सुरु भएयता अमेरिकामा अध्यागमन सम्बन्धी धरपकड निकै तीव्र पारिएको छ। जुन महिनाको अन्त्यमा मात्रै पाँच दिनको अवधिमा आइसले करिब १०,००० जनालाई पक्राउ गरेको थियो।
डिपार्टमेन्ट अफ होमल्याण्ड सेक्युरिटीका अनुसार हाल बिना कागजात अमेरिकामा रहेका विदेशीहरूलाई आफैं देश छोड्न प्रोत्साहन गर्न २,६०० डलर र निःशुल्क हवाई टिकटको योजना समेत ल्याइएको छ। यो अफर स्वीकार नगर्नेहरूलाई पक्राउ गरी देश निकाला गरिने र उनीहरूलाई भविष्यमा कहिल्यै अमेरिका फर्कन नदिइने चेतावनी सरकारले दिएको छ।
यस कडा नीतिका कारण कानुनी रूपमा बसोबास गरिरहेका वा ग्रीन कार्डको प्रक्रियामा रहेका व्यक्तिहरू समेत मारमा परिरहेका छन्। हालैका दिनहरूमा अध्यागमन एजेन्ट र प्रदर्शनकारीहरूबीच भएका विभिन्न हिंस्रक झडपहरूमा केही व्यक्तिहरूको मृत्यु समेत भइसकेको छ, जसका कारण अमेरिकामा अध्यागमनको बहस थप चर्किएको छ।