मेक्सिको भयानक दुर्घटना प्रकरण: ५५ आप्रवासीको ज्यान लिने दुर्घटनामा संलग्न थप दुई दोषी ठहर
प्रकाशित मिति : २४ असार २०८३, बुधबार
फोटो : टिन्गी इन्जुरी ल फर्म
मेक्सिकोमा सन् २०२१ को डिसेम्बरमा भएको भयानक ट्रक दुर्घटनाको घटनामा संलग्न थप दुई जना ग्वाटेमाली नागरिकले अमेरिकी अदालतमा मानव तस्करीको आरोप स्वीकार गरेका छन्। उक्त दुर्घटनामा ट्रकभित्र कोच्चिएर यात्रा गरिरहेका १६० भन्दा बढी आप्रवासीमध्ये ५५ जनाको मृत्यु भएको थियो।
बुधबार टेक्सासको संघीय अदालतमा ३४ वर्षीय जोर्गे अगापितो भेन्टुरा र २६ वर्षीय ओस्वाल्डो म्यानुएल जाभाला क्विनोले आफ्नो गल्ती स्वीकार गरेका हुन्। भेन्टुरालाई सन् २०२४ को डिसेम्बरमा टेक्सासबाट पक्राउ गरिएको थियो भने क्विनोलाई सन् २०२५ मा सुपुर्दगी गरी अमेरिका ल्याइएको थियो। जस्टिस डिपार्टमेन्टका अनुसार उनीहरू दुवैलाई जन्मकैदसम्मको सजाय हुन सक्छ र यसको फैसला आगामी अक्टोबर ६ मा सुनाइनेछ।
अदालतमा बयान दिँदै उनीहरूले ग्वाटेमालाबाट मेक्सिको हुँदै वयस्क तथा नाबालिग बालबालिकालाई अवैध रूपमा अमेरिका भित्र्याउने संगठित गिरोहमा काम गरेको स्वीकार गरे।
सन् २०२१ डिसेम्बर ९ मा मेक्सिकोको चियापास राज्यस्थित तुस्त्ला गुटिएरेज सहर नजिकै १६६ जना आप्रवासी बोकेको एउटा ठूलो ट्र्याक्टर-टेलर ट्रक अनियन्त्रित भई पुलमा ठोक्किएर पल्टिएको थियो। दुर्घटना यति भयानक थियो कि घटनास्थलमा शवहरू जताततै छरिएका थिए।
दुर्घटनामा ज्यान गुमाउने ५५ जनामा एक १६ वर्षीया बालिकासमेत थिइन्। सो दुर्घटनामा बाँच्न सफल भएका यात्रुहरूका अनुसार ट्रकभित्र मानिसहरूलाई यति कोचिएको थियो कि कसैलाई पनि बस्ने ठाउँ थिएन, सबैजना उभिएरै यात्रा गर्न बाध्य थिए।
मृतकहरूमध्ये अधिकांश ग्वाटेमाली नागरिक थिए भने घाइतेहरूमा डोमिनिकन गणतन्त्र, होन्डुरस, मेक्सिको र इक्वेडरका नागरिक पनि सामेल थिए। यस घटनामा कुल ६ जनालाई अभियुक्त बनाइएकोमा अहिलेसम्म ५ जनाले आफ्नो अपराध स्वीकार गरिसकेका छन् भने बाँकी एक जनाको मुद्दा प्रक्रियामै छ।
सहायक अमेरिकी महान्यायाधिवक्ता ए. टाइसन दुभाले एक विज्ञप्ति जारी गर्दै भनेका छन्, “यी अभियुक्तहरूले देशको अध्यागमन कानुन उल्लंघन गर्दै असहाय मानिसहरूको शोषण गरे, जसको परिणाम स्वरूप यति ठूलो मानवीय क्षति हुन पुग्यो।”