अमेरिका-क्यानाडा सीमाको नवनिर्मित पुल विवादको भुमरीमा: ट्रम्पको अवरोधका कारण उद्घाटन रोकियो
प्रकाशित मिति : १४ असार २०८३, आइतबार
Photo: Nattipat Vesvarute/Unsplash
अमेरिका र क्यानाडाको सीमा क्षेत्रमा रहेको उत्तर अमेरिकाकै सबैभन्दा व्यस्त स्थल मार्गमा निर्मित एउटा नयाँ ठूलो पुल निर्माण सम्पन्न भइसक्दा पनि राजनीतिक खिचातानीका कारण बन्द अवस्थामा रहेको छ। हरेक वर्ष अर्बौँ डलर बराबरका गाडीका पार्टपुर्जा, मेसिनरी र अन्य सामग्री बोकेका लाखौँ ट्रकहरू ओहोरदोहोर गर्ने यो मार्गमा बनेको गोर्डी हावे इन्टरनेसनल ब्रिजको उद्घाटन अन्तिम समयमा आएर रोकिएको हो।
क्यानेडियन आइस हक्कीका दिग्गज खेलाडी गोर्डी हावेको नाममा नामाकरण गरिएको यस पुलको निर्माण कार्य सन् २०१८ मा सुरु भएको थियो। पूर्व निर्धारित योजना अनुसार यसै वर्षको सुरुवातमै यो पुल सञ्चालनमा आउनुपर्ने थियो। तर, अमेरिकी राष्ट्रपति डोनाल्ड ट्रम्पको एउटा सामाजिक सञ्जालको पोस्ट र हस्तक्षेपका कारण यसको उद्घाटन अनिश्चित बनेको छ।
राष्ट्रपति ट्रम्पले पुल सञ्चालन अनुमति दिनुअघि क्यानाडाले उक्त पुलको स्वामित्व अमेरिकासँग बराबर बाँडफाँड गर्नुपर्ने माग राखेका छन्। महिनौँको अन्योलपछि जुन महिनामा पुल प्रशासनले भव्य उद्घाटनको तालिका तय गरेको भए तापनि अन्तिम मिनेटमा आएर उक्त कार्यक्रम रद्द गरियो।
क्यानेडियन ट्रकिङ एलायन्स तथा ओन्टारियो ट्रकिङ एसोसिएसनका अध्यक्ष स्टिफन लास्कोभस्की भन्छन्, म उद्घाटन समारोहमा जानै लागेको थिएँ, श्रीमतीले फोन बजिरहेको छ भनिन्। फोन उठाउँदा त्यहाँ नआउनु भन्ने जानकारी पाइयो।
वर्तमान सम्झौता अनुसार यो पुल क्यानाडा सरकार र मिचिगन राज्यको संयुक्त स्वामित्वमा छ। पुल निर्माणको सम्पूर्ण खर्च सुरुमा क्यानाडाले बेहोर्ने र पछि पुलको आम्दानी बाट उक्त खर्च असुल भएपछि मिचिगन राज्यसँग नाफा आधा-आधा बाँड्ने सहमति भएको थियो। तर, राष्ट्रपति ट्रम्पले यो सम्झौता पर्याप्त नभएको दाबी गरेका छन्।
यसैबीच, केही क्यानेडियन राजनीतिज्ञहरूले भने यस विवादको पछाडि व्यापारिक स्वार्थ लुकेको आशंका गरेका छन्। उनीहरूका अनुसार, यसै क्षेत्रमा सञ्चालित प्रतिस्पर्धी ‘अम्बास्डर ब्रिज’ का मालिक मोरोन परिवारले ट्रम्पलाई यस कार्यका लागि उक्साएका हुन सक्छन्। मोरोन परिवारले हालैका वर्षहरूमा रिपब्लिकन पार्टी र ट्रम्प निकटका ‘सुपर पीएसी’ कोषमा लाखौँ डलर चन्दा दिएका छन्।
पुल सञ्चालनमा ढिलाइ हुँदा यसले दुवै देशको यातायात र व्यापार क्षेत्रमा ठूलो असर पुऱ्याइरहेको छ, जसको बाछिटा बिस्तारै सम्पूर्ण महाद्वीपभरि देखिन थालेको छ।