सानफ्रान्सिस्कोको आप्रवासन अदालत अचानक बन्द, हजारौंको मुद्दा अन्योलमा
निर्धारित समयभन्दा आठ महिना अगावै संघीय सरकारले सनफ्रान्सिस्कोको १०० मन्टगोमेरी स्ट्रिटमा रहेको आप्रवासन अदालत स्थायी रूपमा बन्द गरेको छ । यस कदमले हजारौं आप्रवासीहरूको मुद्दालाई अन्योलमा पारेको छ भने अधिकारकर्मीहरूले यसबाट थप ढिलाइ र अन्योल बढ्ने चेतावनी दिएका छन् । अदालत सञ्चालनको अन्तिम समयमा सेवाका लागि लाइनमा केवल एक जना मात्र बाँकी रहेका थिए । यो अदालत बन्द हुनुलाई कानुनी विज्ञहरूले देशकै प्रमुख आप्रवासन केन्द्रमा लागेको ठुलो धक्काका रूपमा व्याख्या गरेका छन् ।
युनिभर्सिटी अफ सनफ्रान्सिस्कोका कानुन र आप्रवासन अध्ययनका प्राध्यापक बिल हिङका अनुसार यस क्षेत्रमा करिब १५,००० मुद्दाहरू अहिले अनिर्णयको अवस्था मा रहेका छन् । सनफ्रान्सिस्को र बे एरिया शरणार्थी आवेदनका लागि प्रमुख केन्द्र मानिन्छ, त्यसैले यो निर्णय त्यहाँ आउनेहरूका लागि ठुलो प्रहार हो । मे १ को बन्द हुनु अगावै न्याय मन्त्रालयले अदालतका २२ मध्ये कम्तीमा २० जना आप्रवासन न्यायाधीशहरूलाई बर्खास्त गरेको थियो । बर्खास्तमा परेका न्यायाधीश जेरेमिया जोन्सनले आफ्नो काम इमानदारीपूर्वक गरेको कारणले नै आफूलाई हटाइएको दाबी गरेका छन् ।
प्राध्यापक हिङले यस अदालत बन्द गरिनुको पछाडि शरणार्थी मामिलामा न्यायाधीशहरूको निष्पक्षता र उच्च स्वीकृति दर मुख्य कारण रहेको हुनसक्ने आशङ्का व्यक्त गरेका छन् । निष्पक्ष न्यायाधीशहरूलाई हटाउनका लागि नै अदालत बन्द गर्ने बाटो रोजिएको उनको तर्क छ । यद्यपि, अमेरिकी न्याय विभाग अन्तर्गतको ‘एक्जिक्युटिभ अफिस फर इमिग्रेसन रिभ्यु’ ले भने १०० मन्टगोमेरी स्ट्रिटको सञ्चालनलाई नजिकैको कङ्कर्ड आप्रवासन अदालतमा सार्नु आर्थिक रूपमा किफायती हुने बताएको छ ।
कङ्कर्डका आप्रवासन अधिवक्ताहरू भने यो निर्णयले वर्षौँको ढिलाइ निम्त्याउनेमा चिन्तित छन् । सनफ्रान्सिस्कोमा १,२०,००० र कङ्कर्डमा ६०,००० मुद्दाहरू विचाराधीन छन् । कङ्कर्ड अदालतले डिसेम्बर अघि सुनुवाइ सुरु नगर्ने जानकारी दिएपछि अन्योल झनै बढेको छ । धेरै मानिसहरूले आफ्नो सुनुवाइको मिति र स्थान परिवर्तन भएको जानकारी नपाउँदा ‘डिपोर्टेशन अर्डर’ (देश निकालाको आदेश) जारी हुनसक्ने जोखिम बढेको भन्दै अधिवक्ताहरूले अनलाइन पोर्टल मार्फत नियमित अपडेट चेक गर्न सुझाव दिएका छन् ।