अमेरिकामा विवादास्पद एप्स्टाइन प्रकरण: ट्रम्प दम्पतीकै कुरा मिलेन
Trump Military Parade
अमेरिकाकी प्रथम महिला मेलानिया ट्रम्पले आफूलाई बदनाम यौन अपराधी जेफ्री एप्स्टाइनसँग जोड्ने प्रयास गरिएको भन्दै त्यसको कडा आलोचना गरेकी छन्। उनले ह्वाइट हाउसबाट ती दाबीहरूलाई ‘झुटा आरोप’ भन्दै खण्डन गरेकी हुन्।
साथै, उनले अमेरिकी संसद् (कंग्रेस) लाई एप्स्टाइनका पीडितहरूलाई सार्वजनिक सुनुवाइमा आफ्नो बयान दिने अवसर मिलाउन आह्वान गरेकी छन्। उनको यो भनाइले पति राष्ट्रपति डोनाल्ड ट्रम्प र ह्वाइट हाउसको आधिकारिक धारणा विपरीत सन्देश दिएको देखिन्छ। यसअघि ट्रम्प प्रशासनले एप्स्टाइनसँग सम्बन्धित विषयलाई कम महत्त्व दिन खोजिरहेको थियो।
स्रोतका अनुसार डोनाल्ड ट्रम्पलाई उनकी पत्नीले यस्तो अभिव्यक्ति दिने योजना बनाएको जानकारी थियो। तर, पछि एक अन्तर्वार्तामा ट्रम्पले आफूलाई यसबारे पूर्वजानकारी नभएको बताएका छन्।
मेलानिया ट्रम्पले भनिन्, “मेरो एप्स्टाइनसँग कहिल्यै मित्रता थिएन। सामाजिक कार्यक्रमहरूमा कहिलेकाहीँ सँगै उपस्थित हुनु सामान्य कुरा हो। मसँग एप्स्टाइन वा उनकी सहयोगी घिस्लेन म्याक्सवेलको कुनै सम्बन्ध थिएन।”
ह्वाइट हाउसका केही अधिकारीहरू उनको यस्तो अभिव्यक्तिको समयलाई लिएर आश्चर्यमा परेका छन्। कतिपयले यसले पुरानो र विवादित विषयलाई पुनः चर्चामा ल्याएको बताएका छन्। तर मेलानिया निकट स्रोतहरूले भने सामाजिक सञ्जालमा फैलिएका अफवाहका कारण उनी यस्तो कदम चाल्न बाध्य भएको बताएका छन्।
मेलानिया ट्रम्पले कंग्रेसलाई आह्वान गर्दै भनिन्, “एप्स्टाइनका पीडित महिलाहरूलाई सार्वजनिक रूपमा आफ्नो कथा सुनाउने अवसर दिनुपर्छ। यदि उनीहरू चाहन्छन् भने, उनीहरूको बयान शपथसहित कंग्रेसमा दर्ता गरिनुपर्छ।”
यस अभिव्यक्तिपछि राजनीतिज्ञ र पीडित अधिकारकर्मीहरूले थप उत्तरदायित्वको माग गरेका छन्। केहीले न्याय मन्त्रालयले ठोस कदम चाल्नुपर्ने बताएका छन् भने केही पीडित समूहहरूले यस्तो प्रस्तावले पीडितहरूमाथि नै जिम्मेवारी सार्ने प्रयास भएको भन्दै न्यायका लागि कानुनी प्रक्रिया बलियो बनाउनुपर्नेमा जोड दिएका छन्।
मेलानिया ट्रम्पले आफूलाई एप्स्टाइनका अपराधबारे कुनै जानकारी नभएको स्पष्ट पारेकी छन्। उनले भनिन्, “मलाई उनका अपराधबारे केही थाहा थिएन। म कहिल्यै पनि कुनै रूपमा संलग्न थिइनँ। म उनको विमान वा निजी टापुमा कहिल्यै गएकी छैन।”
दोस्रो कार्यकालमा मेलानिया ट्रम्पले अपेक्षाकृत कम सार्वजनिक गतिविधि गरेकी छन्। उनी प्रायः पाम बिच र न्युयोर्कमा बस्दै आएकी छन्। हाल उनी बालबालिकामा जिम्मेवार कृत्रिम बुद्धिमत्ता को प्रयोग, अपहृत बालबालिकाको पुनर्मिलन तथा डिजिटल दुरुपयोग विरुद्धको कानुन निर्माण जस्ता कार्यमा केन्द्रित रहेकी छन्।