इरान युद्धसम्बन्धी फरक प्रस्तावमाथि सुरक्षा परिषदमा मतदानको तयारी
प्रकाशित मिति : २६ फाल्गुन २०८२, मंगलबार
The UN Security Council meets to discuss the situation in Ukraine at UN headquarters in New York, on April 29, 2025. (Photo by CHARLY TRIBALLEAU / AFP)
संयुक्त राष्ट्र संघ सुरक्षा परिषद्ले इरानसँग सम्बन्धित युद्ध र त्यसको क्षेत्रीय प्रभावबारे दुई फरक प्रस्तावमाथि मतदान गर्ने तयारी गरेको छ।
खाडी देशहरूले पेस गरेको पहिलो प्रस्तावमा इरानले ती देशहरू तथा जोर्डनमाथि गरेको आक्रमणको निन्दा गरिएको छ। यसैबीच, सुरक्षा परिषद्मा इरानको सहयोगी रुसले अर्को प्रतिस्पर्धी प्रस्ताव अघि सारेको छ।
उक्त प्रस्तावमा इरान, इजरायल वा अमेरिकाको नाम नलिई सबै पक्षद्वारा नागरिकमाथि भएका आक्रमणको निन्दा गरिएको छ। साथै, उक्त प्रस्तावमा सबै पक्षलाई लडाइँ रोक्न तथा पुनः वार्तामा फर्किन आग्रह गरिएको छ।
यो संघर्ष सुरु भएपछि परिषद्ले आपतकालीन बैठक गरेको थियो। त्यसपछि चालिन लागेको यो नै पहिलो औपचारिक कदम हो।
त्यस बैठकमा सदस्यहरूलाई सम्बोधन गर्दै संयुक्त राष्ट्र संघका महासचिव एन्टोनियो गुटेरेसले इजरायल र अमेरिकाले इरानमाथि गरेको हवाई आक्रमण तथा त्यसको जवाफमा इरानले क्षेत्रका अन्य देशमाथि गरेको आक्रमणलाई संयुक्त राष्ट्र संघको बडापत्र को उल्लंघन भएको बताएका थिए।
संयुक्त राष्ट्र संघका लागि इरानका राजदूत अमिर सइद इरानीले खाडी देशहरूको आलोचना गर्दै उनीहरूले आक्रमणकारी र पीडितको भूमिका उल्ट्याउन खोजेको आरोप लगाए। उनले उक्त प्रस्तावलाई पक्षपाती र राजनीतिक उद्देश्यले प्रेरित भएको बताए।
हाल प्रस्तुत गरिएको पहिलो प्रस्तावलाई बेलायतसहित ९० भन्दा बढी देशहरूले समर्थन गरेका छन्। उक्त प्रस्तावमा इरानले छवटा खाडी देशहरू र जोर्डनविरुद्ध प्रत्यक्ष वा आफ्ना सहयोगी समूहहरूमार्फत गरेका सबै आक्रमण र धम्की तुरुन्त रोक्न माग गरिएको छ।
साथै, तेहरानले विश्व व्यापारका लागि अत्यन्त महत्त्वपूर्ण मानिने हर्मुजमा अन्तर्राष्ट्रिय जहाज आवतजावत बन्द गर्ने वा अवरोध गर्ने कुनै पनि कार्य वा धम्कीको कडा निन्दा गरिएको छ।