अमेरिकी राष्ट्रपति ट्रम्पको मार–ए–लागो रिसोर्टमा प्रवेश गर्ने व्यक्तिको गोली हानी हत्या
प्रकाशित मिति : १० फाल्गुन २०८२, आइतबार
ट्रम्पको मार–ए–लागो रिसोर्ट । फाइल तस्वीर । स्रोत: ह्वाइट हाउस
अमेरिकी राष्ट्रपति डोनाल्ड ट्रम्पको मार–ए–लागो रिसोर्टमा सुरक्षित परिधि तोडेर आइतबार बिहान बन्दुकसहित प्रवेश गर्ने एक व्यक्तिलाई अमेरिकी सीक्रेट सर्भिस र स्थानीय प्रहरीले गोली हानी हत्या गरेको छ ।
घटनामा संलग्न २१ वर्षीय ऑस्टिन टकर मार्टिन नर्थ क्यारोलिनाका भएको पुष्टि भएको छ। उनी केही दिनअघिदेखि हराइरहेका थिए। घटनाको समयमा ट्रम्प वाशिङ्टनमा रहेको बताइएको छ।
सीक्रेट सर्भिसका अनुसार, मार्टिनसँग शटगन र इन्धन क्यान थियो। उनलाई रिसोर्टको उत्तर ढोकामा बिहान १ः३० बजे देखेपछि दुई एजेण्ट र पाम बीच काउन्टी शेरिफको डिप्टीले उनीसँगको वार्तालापमा उक्त वस्तु राख्न आदेश दिएका थिए। तर, उनले शटगन उठाउँदा सुरक्षाकर्मीले गोली चलाएका थिए।
घटनामा कुनै सुरक्षाकर्मी घाइते भएका छैनन्। ह्वाइट हाउसकी प्रवक्ता क्यारोलिन लेभिटले भनिन् – “सीक्रेट सर्भिसले शटगन र इन्धन क्यानसहितको पागल व्यक्तिलाई तुरुन्त र निर्णायक रूपमा नियन्त्रणमा लियो ।”
घटनाको एफबीआईले अनुसन्धान सम्हालेको छ भने घटनास्थलबाट प्रमाण संकलन गरिरहेको छ। एफबीआई निर्देशक काश पटेलले सामाजिक सञ्जालमा भने, “अनुसन्धानका लागि आवश्यक सबै स्रोतहरू प्रयोग गरिँदैछन्।”
यो घटना राजनीतिक हिंसामा वृद्धि भइरहेको समयमा भएको हो। २०२४ मा ट्रम्पमाथि विभिन्न हत्या प्रयास भएका थिए, जसमा एक गोल्फ कोर्स घटनासमेत समावेश थियो। अमेरिकी अर्थमन्त्री स्कट बेसेन्टले घटनापछि ट्रम्पसँग कुरा गरी सीक्रेट सर्भिसलाई धन्यवाद दिएका छन्।