अमेरिकामा एक व्यक्तिद्वारा पूर्वपत्नी र छोराको गोली हानी हत्या
प्रकाशित मिति : ६ फाल्गुन २०८२, बुधबार
अमेरिकाको रोड आइल्यान्ड राज्यमा एक व्यक्तिले आफ्नी पूर्वपत्नी र छोराको गोली हानी हत्या गरेका छन्। हक्की खेल चलिरहेका बेला भएको उक्त हिंसात्मक घटनामा ती व्यक्तिले परिवारका सदस्यहरूको ज्यान लिएका हुन्।
पाव्टकेट प्रहरी प्रमुख टिना गोन्काल्भेसका अनुसार मृतकहरूमा आक्रमणकारीकी पूर्वपत्नी रोन्डा डोर्गन र वयस्क छोरा एडन डोर्गन रहेका छन्। आक्रमणकारीले पूर्वपत्नीका आमाबुबा र एक पारिवारिक साथी गरी थप तीन जनालाई पनि गोली हानेर घाइते बनाएका छन्। प्रहरीका अनुसार ५६ वर्षीय आक्रमणकारी रोबर्ट डोर्गनले घटनालगत्तै आफैँलाई गोली हानी आत्महत्या गरेका थिए। उनी रोबर्टा एस्पोसिटो नामले पनि चिनिन्थे।
यो घटना प्रोभिडेन्स सहर नजिकैको ‘डेनिस एम. लिन्च एरिना’ भित्र भएको हो। प्रहरीले घटनाका बेला उपस्थित करिब १०० जना प्रत्यक्षदर्शीहरूसँग सोधपुछ गरी थप विवरण संकलन गरिरहेको जनाएको छ। खेलकुद कार्यक्रम ‘लाइभबार्न’ नामक अनलाइन प्लेटफर्ममार्फत प्रत्यक्ष प्रसारण भइरहेका बेला यो घटना घटेको थियो।
सामाजिक सञ्जालमा सार्वजनिक भएका भिडियोहरूमा ‘आइस रिङ्क’ (बरफ मैदान) मा खेलाडीहरू खेलिरहेका बेला अचानक गोली चलेको आवाज सुनिन्छ। त्यसलगत्तै खेलाडी र दर्शकहरूबीच भागाभाग मच्चिएको दृश्य देखिन्छ।
डोर्गन मेन राज्यको बाथ सहरस्थित ‘जेनेरल डायनामिक्स बाथ आइरन वर्क्स’ मा कार्यरत कर्मचारी रहेको खुलेको छ। उक्त संस्था अमेरिकी नौसेनाका लागि जहाज निर्माण गर्ने ठेक्का कम्पनी हो। यद्यपि, कम्पनीका प्रवक्ताले डोर्गनको पद वा कार्यअवधिबारे थप विवरण दिन अस्वीकार गरेका छन्।
सैन्य अभिलेखअनुसार डोर्गन सन् १९८८ अप्रिल २६ मा अमेरिकी मरीन कोरमा भर्ना भएका थिए। तर, मरीन कोरका प्रवक्ता मेजर ज्याकोबी गेट्टीका अनुसार उनको आचरण र सेवा मरीन कोरको मापदण्डअनुरूप नभएपछि तीन महिनाभन्दा कम समयमै उनलाई सेवाबाट हटाइएको थियो।
यो गोलीकाण्ड ब्राउन युनिभर्सिटीमा भएको हिंसात्मक घटनाको करिब दुई महिनापछि भएको हो, जहाँ दुई विद्यार्थीको मृत्यु हुनुका साथै नौ जना घाइते भएका थिए।