न्युयोर्क सिटीमा २ मिलियनभन्दा बढीले गरे मतदान, सन् १९६९ पछिकै उच्च
प्रकाशित मिति : कार्तिक १८, २०८२ मंगलबार
न्युयोर्क सिटी मतदानस्थलमा देखिएको चिन्ह । फोटो : राजन काफ्ले
नयाँ मेयर छान्नका लागि न्युयोर्क सिटीमा भएको मतदानमा बेलुका २ मिलियनभन्दा बढीले मतदानका लागि चेकइन गरेको न्युयोर्क सिटी बोर्ड अफ इलेक्सनले जानकारी दिएको छ । यो अग्रिम मतदान चेकइनसहितको नम्बर हो ।
यसपटकको न्युयोर्क सिटीको मेयरको चुनावमा ऐतिहासिक रुपमा उच्च मतदाताले मतदान गरेका छन् । यो रेकर्ड १९६९ पछिकै उच्च देखिएको छ । सन् २००१ मा १४ लाख ८० हजार, २००५ मा १२ लाख ८९ हजार, २००९ मा ११ लाख ५४ हजार, २०१३ मा १० लाख ८७ हजार, २०१७ मा ११ लाख ६६ हजार, २०२१ मा ११ लाख २५ हजारले मतदान गरेका थिए ।
नेपाली अमेरिकनहरु पनि उत्साहका साथमा मदानमा सहभागी भएका थिए । न्युयोर्क सिटीको आजको मतदानमा हजारौं नेपाली अमेरिकनहरु मतदानका लागि योग्य रहेका थिए । न्युयोर्कको अस्टोरियामा बस्दै आएका नेपाली अमेरिकन बासु फुलाराले आज बिहानै न्यूयोर्क शहरको मेयरको चुनावमा मतदान गरेको बताउदै यो शहरको भविष्यमा योगदान पुर्याउने एक सरल तर अर्थपूर्ण तरिका भएको बताएका छन् । फुलारा न्युयोर्कका कानुन व्यवसायी समेत हुन् भने लामो समयदेखि न्युयोर्कको क्वीन्समा बस्दै आएका छन् ।
मेरिल्याण्डका नेपाली मूलका राज्य सांसद ह्यारी भण्डारीले भर्जिनिया, न्युजर्सी र न्युयोर्कमा बसोबास गर्ने नेपाली अमेरिकन र समुदायहरूलाई आज चुनावको दिन भएको स्मरण गराउँदै बाहिर निस्केर मतदान गर्दै लोकतन्त्रको उत्सव मनाउन प्रेरित गरेका छन् । उनले भनेका छन् – “तपाईंको मत साँच्चै महत्त्वपूर्ण छ । यसलाई गणना गरौं र हाम्रो लोकतान्त्रिक भावनालाई बलियो बनाइराखौं ।”