न्यूयोर्कमै प्रो-प्यालेस्टिनीको प्रदर्शनमा ट्रम्पको आलोचना गरेपछि कोलम्बियाली राष्ट्रपतिको भिसा रद्द
प्रकाशित मिति : आश्विन १०, २०८२ शनिबार
अमेरिकाले कोलम्बियाका राष्ट्रपति गुस्ताभो पेत्रोको भिसा रद्द गर्ने निर्णय गरेको छ। राष्ट्रपति पेत्रोले शुक्रबार न्यूयोर्कमा प्रो-प्यालेस्टिनी प्रदर्शनमा सहभागी भई अमेरिकी राष्ट्रपति डोनाल्ड ट्रम्पविरुद्ध तीव्र आक्रोश प्रकट गरेका थिए।
अमेरिकी विदेश मन्त्रालयले सामाजिक सञ्जाल एक्समार्फत भन्यो – “हामी पेत्रोको भिसा उनको गैरजिम्मेवार र उत्तेजक गतिविधिका कारण रद्द गर्नेछौं।”
संयुक्त राष्ट्रसंघको मुख्यालय अगाडि आयोजित प्रदर्शनमा पेत्रोले वैश्विक स्तरमा एउटा सशस्त्र बल गठन गर्न आह्वान गरे, जसको प्रमुख उद्देश्य प्यालेस्टिनीहरूलाई मुक्त गर्नु हुने उनले बताए। उनले भने, “यो बल अमेरिकाभन्दा ठूलो हुनुपर्छ।”
त्यसै प्रसङ्गमा उनले अमेरिकी सैनिकहरूलाई खुलेआम ट्रम्पको आदेश उल्लंघन गर्न समेत आग्रह गरे। “न्यूयोर्कबाट म अमेरिकी सैनिकलाई भन्न चाहन्छु, आफ्नो बन्दुक मानिसतर्फ नतोप्नुहोस्। ट्रम्पका आदेश अस्वीकार गर्नुहोस्, मानवताको आदेश पालना गर्नुहोस्,” पेत्रोले स्पेनिस भाषामा भने।
अन्तर्राष्ट्रिय सञ्चारमाध्यमका अनुसार पेत्रो अझै न्यूयोर्कमै छन् वा छैनन् भन्ने तत्काल स्पष्ट हुन सकेको छैन। उनको कार्यालय र कोलम्बियाको परराष्ट्र मन्त्रालयले कुनै प्रतिक्रिया दिएका छैन् ।
ट्रम्प प्रशासन हाल प्रो प्यालेस्टिनी आवाजहरूलाई कठोर रूपमा नियन्त्रणमा ल्याइरहेको छ। तर अर्कोतर्फ, फ्रान्स, बेलायत, अष्ट्रेलिया र क्यानडाले प्यालेस्टिनी राज्यलाई औपचारिक मान्यता दिइसकेका छन्। यस कदमले इजरायल र अमेरिकालाई क्रोधित बनाएको छ।
कोलम्बियाका पहिलो वामपन्थी राष्ट्रपति पेत्रो इजरायलको गाजामा गरिएको युद्धका कट्टर आलोचक हुन्। मंगलबारको संयुक्त राष्ट्र महासभामा उनले ट्रम्पलाई प्रत्यक्ष निशाना बनाउँदै भने, “ट्रम्प गाजामा भइरहेको नरसंहारमा संलग्न छन्। अमेरिकी मिसाइल आक्रमणका कारण अपराधीक मुकदमा चलाउनुपर्छ।”
इजरायली प्रधानमन्त्री बेन्जामिन नेतन्याहूले शुक्रबार महासभामा सम्बोधन गर्दै पश्चिमी मुलुकहरूले प्यालेस्टिनी राज्यलाई मान्यता दिनुलाई कडा आलोचना गरेका थिए । उनले आरोप लगाउँदै भनेका थिए, “यसले संसारलाई सन्देश दिन्छ कि यहूदीहरूलाई मार्दा इनाम पाइन्छ।”
७ अक्टोबर २०२३ मा हमासद्वारा इजरायलमा भएको आक्रमणमा करिब १,२०० मानिस मारिएका थिए र २५१ जना अपहरणमा परेका थिए। त्यसपछि सुरु भएको इजरायलको गाजामाथिको सैन्य आक्रमणले गाजा स्वास्थ्य अधिकारीका अनुसार ६५,००० भन्दा बढी प्यालेस्टिनीको ज्यान लिइसकेको छ र सम्पूर्ण जनसंख्या विस्थापित भएको छ।
धेरै अन्तर्राष्ट्रिय मानवअधिकार विज्ञहरूले यसलाई “नरसंहार” भनेका छन्। तर, इजरायलले भने यो युद्ध आत्मरक्षाका लागि भएको अडान लिएको छ।
यसैबीच, प्यालेस्टिनी प्राधिकरणका राष्ट्रपति महमूद अब्बासलाई अमेरिकाले न्यूयोर्क प्रवेशका लागि भिसा दिन अस्वीकार गरेको थियो । त्यसपछि उनले बिहीबार भिडियोमार्फत संयुक्त राष्ट्र महासभालाई सम्बोधन गरेका थिए।
अब्बासको कार्यालयले यस कदमले १९४७ को संयुक्त राष्ट्र मुख्यालय सम्झौता उल्लंघन भएको आरोप लगाएको छ। तर, वाशिङ्टनले सुरक्षा, चरमपन्थ वा परराष्ट्र नीतिका कारण भिसा अस्वीकार गर्न सक्ने अडान लिएको छ।