विदेशी ट्रक चालकविरुद्ध अमेरिकी कदम : कामदार भिसा स्थगित, अंग्रेजी नजान्दा बढ्यो दुर्घटना
प्रकाशित मिति : भाद्र ५, २०८२ शुक्रबार
अमेरिकी सरकारले व्यावसायिक ट्रक चालकका लागि कामदार भिसा जारी गर्ने प्रक्रिया तत्काल स्थगित गर्ने निर्णय गरेको छ। अमेरिकी विदेशमन्त्री मार्को रुबियोले यो घोषणा गर्दै विदेशी चालकहरूको बढ्दो संख्याले अमेरिकी सडक सुरक्षामा गम्भीर जोखिम निम्त्याइरहेको बताएका छन्।
राष्ट्रपति डोनाल्ड ट्रम्पको प्रशासनले विदेशी चालकलाई लक्षित गर्दै पछिल्ला केही महिनामा कडा नीति लागू गर्दै आएको छ। अप्रिल महिनामा ट्रम्पले कार्यकारी आदेशमा हस्ताक्षर गरी अमेरिकामा व्यावसायिक ट्रक चलाउन अंग्रेजी दक्षता अनिवार्य गर्ने नियमलाई कडाइका साथ कार्यान्वयन गर्न निर्देशन दिएका थिए।
यसैबीच, फ्लोरिडामा भएको घातक दुर्घटनापछि यो मुद्दा झनै चर्चामा आएको छ। फ्लोरिडामा भारतीय नागरिक हरजिन्दर सिंह संलग्न ट्रक दुर्घटनामा तीन जनाको मृत्यु भएको थियो। सिंहले अवैध युटर्न गर्न खोज्दा मिनिभ्यान ट्रकमा ठोक्किँदा दुर्घटना भएको थियो। उनीमाथि “वाहनजन्य हत्या” का तीनवटा अभियोग लगाइएको छ।
अधिकारीहरूले जनाएअनुसार सिंहसँग अमेरिकामा बस्ने कानुनी अनुमति थिएन भने उनी अंग्रेजी पनि बोल्दैनथे। यसरी योग्यतामापदण्ड पालना नगरेका चालकहरू सडकमा खतरापूर्ण साबित भइरहेको अमेरिकी अधिकारीहरूले बताएका छन्।
अमेरिकी तथ्याङ्कअनुसार करिब १६ प्रतिशत ट्रक चालक विदेशी मूलका छन्। ट्रम्पको नयाँ आदेशपछि सीमावर्ती मेक्सिकोका ट्रक चालकहरूले समेत अंग्रेजी सिक्ने अभियान थालेको अन्तर्राष्ट्रिय सञ्चारमाध्यमहरूले उल्लेख गरेका छन्।