क्यालिफोर्नियाका राम तामाङको उपचारका लागि सहयोगको अपिल, २ र ६ बर्षका बच्चाको भविष्यको चिन्ता
प्रकाशित मिति : भाद्र ३, २०८२ बुधबार
क्यालिफोर्नियाको माउन्टेन भ्यूमा बस्ने ३७ वर्षीय राम (छिरिङ) तामाङलाई चौथो चरणको क्यान्सर देखिएपछि उनको परिवार समस्यामा परेको छ। दुई वर्षीया छोरी, ६ वर्षीय छोरा र श्रीमतीसहित बस्दै आएका तामाङ हाल क्यालिफोर्नियाको पालो आल्टोस्थित स्ट्यानफोर्ड अस्पतालमा जीवन र मृत्युको दोसाँधमा पुगेर पीडादायी अवस्थामा छन्।
उपचार र दौडधुपमा उनीहरूको सबै बचत सकिएको छ। अहिले उनीहरूलाई बालबच्चाको हेरचाह, पढाइ, घरको भाडा, किस्ता, बीमाले नधानेको उपचार खर्च र दैनिक जीवनयापनका लागि आर्थिक अभाव भएको भन्दै तामाङ समन्वय समाज, क्यालिफोर्नियाले ‘गोफण्डमी’ मार्फत सहयोगको अपिल गरेको छ। समाजका अध्यक्ष सुरज पाख्रिनले ‘गोफण्डमी’मा पोस्ट गरेको सूचनामा राम (छिरिङ) तामाङको परिवारलाई सघाउन आग्रह गरिएको छ।
यदि तपाई पनि सहयोग गर्न चाहनुहुन्छ भने यहाँ क्लीक गर्नुहोला ।
‘गोफण्डमी’मा उल्लेख भएअनुसार, समुदायका मानिसलाई दुःख पर्दा सधैँ सहयोगका लागि अगाडि सर्ने राम, आफ्ना दुई वर्षीया छोरी जास्मिन र ६ वर्षीय छोरा रोमोनका लागि मात्र नभई सम्पूर्ण परिवारका लागि भरपर्दो र मायालु व्यक्ति हुन्।
‘गोफण्डमी’मा भनिएको छ, “पाँच वर्षअघि आमाको हृदयघातका कारण निधन हुँदा राम (छिरिङ) विक्षिप्त बनेका थिए। त्यसपछि उनले श्रीमती चाँदनी लामासँग मिलेर कुनै न कुनै तरिकाले परिस्थितिलाई सम्हाले र घर किने। आफ्नो र परिवारको भविष्यको सपना पूरा गर्न उनले दुई ठाउँमा दुई सिफ्ट काम गरेर कडा परिश्रम गरेका थिए।”
“तर, गत वर्ष उनलाई क्यान्सरको लक्षण देखियो। नियमित उपचार र जाँच गर्दा पनि रोग निको भएन र हाल उनी क्यान्सरको चौथो चरणमा छन्। क्यालिफोर्नियाको पालो आल्टोस्थित स्ट्यानफोर्ड अस्पतालमा जीवन र मृत्युसँग लड्दै उनी पीडादायी छटपटीमा छन्,” ‘गोफण्डमी’मा उल्लेख गरिएको छ।
पछिल्लो एक वर्षदेखि श्रीमती चाँदनीले आफ्नो काम छोडेर श्रीमानको उपचार र स्याहार गरिरहेको उल्लेख गर्दै ‘गोफण्डमी’मा सहयोगको अपिलका साथ भनिएको छ, “हाल साथीभाइले सहयोग गरिरहेका छन्। रामको उपचारको निरन्तरता र बालबच्चाको हेरचाहका लागि हामी सम्पूर्ण व्यक्ति, संस्था र समुदायलाई ‘गोफण्डमी’ मार्फत सहयोग गर्न हार्दिक अनुरोध गर्दछौँ।”