अमेरिकाको टेक्सासमा बाढीका कारण कम्तीमा २४ को मृत्यु,२५ बेपत्ता
प्रकाशित मिति : असार २०, २०८२ शुक्रबार
अमेरिकाको टेक्सासमा बाढीका कारण कम्तीमा २४ जनाको मृत्यु भएको छ । क्याम्प मिस्टिकका २५ बालिकाहरू अझै बेपत्ता रहेका छन ।
अधिकारिहरूले पुष्टि गरेअनुसार टेक्सासको केर काउन्टीमा आएको बाढीका कारण ज्यान जानेको संख्या अब २४ पुगेको हो । यसअघि यो संख्या १३ थियो।
टेक्सासका उप राज्यपाल ड्यान प्याट्रिकले “बाढी प्रभावित क्षेत्रमा ठूलो स्तरमा खोज तथा उद्धार अभियान जारी रहेको बताएका छन । अभियानमा हेलिकप्टर र ९ वटा उद्धार टोली संलग्न छन्।”
सडकहरूमा अत्यधिक पानी जमेकाले उद्धार र मृतकको खोजी कार्यमा ढिलाइ भइरहेको छ । पश्चिमी टेक्सासमा केही घण्टाभित्रै बाढीको स्थिति अझ गम्भीर हुन सक्ने सम्भावना रहेको मौसम विभागले बताएको छ ।
काउन्टी शेरिफ ल्यारी एल लिथाले भने, “मृतकको परिवारलाई जानकारी दिन बाँकी भएकाले हाललाई उनीहरूको पहिचान सार्वजनिक गरिने छैन।”
केन्डल काउन्टीमा पनि एक जनाको मृत्यु भएको छ, तर त्यो बाढीसँग प्रत्यक्ष सम्बन्धित हो वा होइन भन्ने अझै स्पष्ट भइसकेको छैन।
टेक्सासका मेजर जनरल थोमस स्युल्जरले उच्च क्षमतायुक्त सैन्य सवारी साधनहरू प्रयोग गरी बाढीको पानीबाट प्रभावित क्षेत्रका मानिसहरूलाई सुरक्षित स्थानमा सारिएको बताए । अहिलेसम्म २३७ जनालाई उद्धार गरिएको छ ।
टेक्सास पार्क रेंजरहरू बाढीपीडित नदी किनारको समर क्याम्पसम्म पुग्न सफल भएका छन् । केही बालबालिकालाई उद्धार गर्न सुरु गरिएको छ।
गभर्नर ग्रेग एबटले आपतकालीन घोषणा मा हस्ताक्षर गरेका छन् । उनले भने, “यस घोषणाले उद्धारकर्मीहरूलाई खोज कार्यका लागि आवश्यक सबै स्रोतसाधन उपलब्ध गराउनेछ।”
नेशनल वेदर सर्भिसका अनुसार, पश्चिम मध्य टेक्सासमा अझै थप बाढीको सम्भावना रहेको छ।
मौसम विभागले मानिसहरूलाई पानी भरिएको सडक देख्नेबित्तिकै फर्कन सल्लाह दिएको छ। नदी किनार र कुलोहरू अस्थिर र असुरक्षित बन्न सक्ने भएकाले सतर्क रहन अनुरोध गरिएको छ ।