ट्रम्प प्रशासनको ५ महिना : आप्रवासन नीतिमा कडाइ, १७८ जना नेपाली अमेरिकाबाट देश निकाला
प्रकाशित मिति : असार ६, २०८२ शुक्रबार
अमेरिकी राष्ट्रपतिको रूपमा डोनाल्ड ट्रम्पले दोस्रो कार्यकाल सम्हालेको शुक्रबार ५ महिना पूरा भएको छ । जनवरी २०, २०२५ देखि अमेरिकाको ४७ औँ राष्ट्रपतिको रूपमा शपथ ग्रहण गरेका ट्रम्पको कार्यकालको ५ महिना पूरा भएको हो । ट्रम्पले कार्यकाल सम्हालेसँगै अमेरिकाले कागजातविहीन आप्रवासीहरूलाई फिर्ता पठाउने नीतिलाई कडाइका साथ लागू गरिरहेको छ । जसको प्रभाव अमेरिका रहेका नेपाली समुदायमा पनि प्रत्यक्ष परेको छ ।
राष्ट्रपतिको रूपमा ट्रम्पले कार्यकालको सम्हालेको ५ महिनामा अमेरिकाले १७८ जना नेपालीलाई देश निकाला गरी स्वदेश फर्काएको छ । अमेरिकाले जुन महिनामा मात्रै ३८ जना नेपालीलाई अमेरिकाबाट देश निकाला गरेको हो । अमेरिकाले जुन ८ मा ३७ नेपाली नागरिकलाई चार्टर्ड विमानमार्फत स्वदेश फर्काएको थियो । त्रिभुवन अन्तर्राष्ट्रिय विमानस्थल अध्यागमन कार्यालयका अनुसारमा ३७ नेपाली नागरिकमध्ये ३२ पुरुष र ५ महिला रहेका थिए । अमेरिकी आप्रवासन र भन्सार प्रवर्तन (आइस) को चार्टर्ड विमानमार्फत डिपोर्ट गरिएका नेपाली नागरिकहरू अमेरिकामा बस्नका लागि कानुनी आधार नभएका थिए ।
त्यसअघि जुन ७ मा अमेरिकाले एक जना नेपालीलाई स्वदेश फर्काएका थियो । ती कागजातबिना अमेरिकामा बस्दै आएका पुरुष थिए ।
अमेरिकाले सन् २०२५ को मे महिनामा मात्रै ५८ जना नेपाली नागरिकलाई डिपोर्ट गरेको थियो, जुन अघिल्लो महिना अप्रिलको तुलनामा दोब्बरभन्दा बढी थियो । अप्रिलमा अमेरिकाबाट डिपोर्ट हुने नेपालीहरूको सङ्ख्या २६ जना रहेकोमा मे महिनामा झन्डै १२३ प्रतिशतले वृद्धि भएको थियो । विमानस्थल अध्यागमनका अनुसार मे महिनामा डिपोर्ट गरिएकाहरू सबै पुरुष रहेका थिए ।
ट्रम्प प्रशासन सुरु भइसकेपछि अमेरिकाले जनवरीमा ६ जना नेपालीहरूलाई डिपोर्ट गरेको थियो । फेब्रुअरी महिना भरी मात्रै अमेरिकाले १८ जनालाई नेपाल फर्काएको हो । फेब्रुअरी ८ मा एकै दिन ६ जना नेपालीहरू अमेरिकाबाट डिपोर्ट भएर नेपाल पुगेका थिए । यस्तै, अमेरिकाले अमेरिकाले मार्च महिनामा ३२ जना नेपालीहरूलाई डिपोर्ट गरेको थियो । यो सँगै सन् २०२५ को जनवरी २० देखि जुन २० सम्म अमेरिकाबाट निष्कासित हुने नेपालीको सङ्ख्या एक सय ७८ पुगेको हो ।
“जनवरीमा ६, फेब्रुअरीमा १८, मार्चमा ३२, अप्रिलमा २६, मेमा ५८ र जुन २० सम्म ३८ जना नेपालीहरू अमेरिकाबाट देश निकाला भई फर्किएको हाम्रो तथ्याङ्कमा उल्लेख छ । ३७ जना एकैपटक फर्किएपछि आजको मितिको सम्म कोही पनि फर्किएका छैनन् ।”, विमानस्थल अध्यागमनका एक अधिकारीले भने ।
यसरी अमेरिकाबाट फिर्ता पठाइएका नेपालीहरूलाई त्रिभुवन अन्तर्राष्ट्रिय विमानस्थलमा ल्याएपछि अध्यागमन अधिकारीहरूले नेपाल प्रहरीको मानव बेचबिखन अनुसन्धान ब्युरोमा जिम्मा लगाउने गरेका छन् । ब्युरोका अधिकारीहरूले सोधपुछ गरेपछि उनीहरूलाई आफन्त तथा साथीभाइहरूको जिम्मा लगाउँछन् । प्रहरीका अनुसार अहिलेसम्म फिर्ता भएकाहरू अधिकांश मेक्सिको हुँदै विना भिसा अमेरिका छिर्नेहरू रहेका छन् । उनीहरूले अमेरिका प्रवेशका लागि १ लाख डलरसम्म खर्च गरेको पाइएको हो ।
त्यसअघि, सन् २०२४ मा जम्मा ५२ जना नेपाली अमेरिकाबाट डिपोर्ट भएका थिए । सन् २०२४ को १२ महिनाको तुलनामा सन् २०२५ को ५ महिनामा अमेरिकाबाट डिपोर्ट हुने नेपालीहरूको सङ्ख्या झन्डै तीन गुणा बढी रहेको छ ।
सन् २०२३ मा २४, सन् २०२२ मा २२ र सन् २०२१ मा ३५ जना नेपाली अमेरिकाबाट डिपोर्ट भएको अध्यागमन विभागको तथ्याङ्कमा उल्लेख छ । सन् २०२१ को जनवरी १७ देखि सन् २०२४ को डिसेम्बर ३० सम्म एक सय ३३ नेपाली अमेरिकाबाट डिपोर्ट भएका थिए ।