भारतले दियो एलन मस्कको स्वामित्वमा रहेको स्टारलिङ्क इन्टरनेटलाई अनुमति
प्रकाशित मिति : असार ४, २०८२ बुधबार
भारत सरकारले एलन मस्कको स्वामित्वमा रहेको स्पेसएक्स कम्पनीको स्टारलिङ्क स्याटेलाइट इन्टरनेट सेवालाई आधिकारिक रूपमा अनुमति दिएको छ। भारतका सञ्चारमन्त्री ज्योतिरादित्य सिन्धियाले यसलाई देशको ‘कनेक्टिभिटीको अर्को सीमा’को सुरुआत भनेका छन्।
स्टारलिङ्कले पृथ्वीको निम्न कक्षामा रहेका स्याटेलाइटमार्फत दुर्गम र पहुँचविहीन स्थानहरूमा उच्च गतिको इन्टरनेट सेवा पुर्याउने लक्ष्य राखेको छ। यसको सुरुआतसँगै भारतमा स्पेक्ट्रम बाँडफाँट, मूल्य निर्धारणजस्ता विषयमा व्यापक बहस सुरु भएको छ।
सञ्चारमन्त्री सिन्धियाले स्पेसएक्सकी अध्यक्ष तथा प्रमुख परिचालन अधिकृत ग्वेनी सटवेलसँग ‘फलदायी बैठक’ सम्पन्न भएको जानकारी दिएका छन्। उनले मङ्गलबार एक्समा लेख्दै भने, “सटवेलले भारतबाट स्टारलिङ्कलाई प्राप्त इजाजतपत्रको सराहना गर्नुभयो र यसलाई यात्राको उत्कृष्ट सुरुआत भन्नुभयो।”
यो निर्णय त्यतिबेला आएको हो, जब भारतका प्रमुख दुई टेलिकम कम्पनीहरू जिओ प्लेटफर्म्स र भारती एयरटेलले मार्चमा आफ्ना ग्राहकहरूलाई स्टारलिङ्क इन्टरनेट सेवा दिन स्पेसएक्ससँग सम्झौता गरेका थिए।
यसबीच, एलन मस्कले जिओका मालिक तथा एशियाका सबैभन्दा धनी व्यक्ति मुकेश अम्बानीसँग भारतमा स्याटेलाइट स्पेक्ट्रम वितरणका बारेमा छलफल गरिसकेका छन्।
हाल मस्कका व्यापारिक गतिविधिहरू भारतमा मुख्यतः एक्समा सीमित छन्, तर उनको इलेक्ट्रिक कार कम्पनी टेस्ला पनि भारतीय बजारमा छिर्ने तयारीमा छ।