इरानी क्षेप्यास्त्र आक्रमणले तेल अभिवस्थित अमेरिकी दूतावासमा क्षति, कर्मचारी सबै सुरक्षित
प्रकाशित मिति : असार २, २०८२ सोमबार
इजरायलका लागि अमेरिकी राजदूत माइक हकाबीले तेल अभिवस्थित अमेरिकी दूतावास भवन नजिकै इरानबाट प्रहार गरिएको क्षेप्यास्त्र आक्रमणमा केही सामान्य भौतिक क्षति भए पनि कुनै पनि अमेरिकी कर्मचारी घाइते नभएको बताएका छन् ।
यो हमला इजरायलद्वारा इरानभित्रका गहिरा सैन्य लक्ष्यहरूमा आक्रमण गरेपछि भएको हो। दुबै पक्षले थप आक्रमणको चेतावनी दिँदै क्षेत्रीय तनावलाई अझ चर्काएका छन्।
इरानले सोमबार बिहान इजरायली सहरहरूलाई लक्षित गर्दै मिसाइल आक्रमण गरेको थियो। इजरायली सेनाले नागरिकहरूलाई सुरक्षाका लागि सतर्कता अपनाउन चेतावनी जारी गरेपछि, एएफपीद्वारा सार्वजनिक गरिएका तस्वीरहरूले तेल अभिवको तटीय क्षेत्रमा भवनहरूमा क्षति पुगेको देखाएका छन्।
राजदूत हकाबीले सामाजिक सञ्जाल एक्समा लेख्दै भने, ‘तेल अभिवस्थित अमेरिकी दूतावास शाखा नजिकै मिसाइल प्रहारबाट सामान्य क्षति पुगेको छ, तर कुनै पनि अमेरिकी कर्मचारीलाई चोटपटक लागेको छैन।’
उनले जेरुसेलमस्थित अमेरिकी दूतावास सोमबार बन्द रहने जानकारी दिँदै भनेका छन् ‘स्थानमा आश्रयको आदेश अझै प्रभावमा छ’
दशकौँदेखि चलिरहेको शत्रुता र प्रोक्सी युद्धहरू पछाडि राख्दै इजरायलले गत हप्ता इरानमाथि गरेको आक्रमणले हालसम्मकै गम्भीर प्रत्यक्ष द्वन्द्वको संकेत दिएको छ, जसले सम्पूर्ण मध्यपूर्वलाई तान्न सक्ने चिन्ता उत्पन्न भएको छ।
इजरायली स्रोतहरूका अनुसार, आक्रमणले इरानका सैन्य र आणविक स्थापनाहरूलाई लक्षित गरेको थियो, जसमा उच्चस्तरीय कमान्डरहरू र आणविक वैज्ञानिकहरू मारिएको दाबी गरिएको छ।
यसैबीच, एक वरिष्ठ अमेरिकी अधिकारीले आइतबार जानकारी दिँदै अमेरिकी पूर्व राष्ट्रपति डोनाल्ड ट्रम्पले इजरायललाई इरानका सर्वोच्च नेता अयातुल्लाह अली खामेनीको हत्या गर्ने योजना रोक्न आग्रह गरेको बताएका छन्।
यद्यपि, ट्रम्पले पत्रकारहरूसँग भने, “कहिलेकाहीँ लड्नैपर्छ,” भन्दै सम्भावित समाधानको उपाय पनि खोज्नुपर्नेमा जोड दिएका छन्।