अमेरिकी संसद भवनअगाडि प्रदर्शन: पूर्व सैनिक र परिवारका सदस्यहरू पक्राउ
प्रकाशित मिति : जेष्ठ ३१, २०८२ शनिबार
Photo by Ting Shen/Xinhua)
अमेरिकी संसद भवन (यूएस क्यापिटल) अगाडि भएको विरोध प्रदर्शनमा करिब ६० जना प्रदर्शनकारी पक्राउ परेका छन्। शुक्रबार साँझ भएको यस प्रदर्शनमा उनीहरूले सुरक्षाकर्मीहरूको साइकल ब्यारिकेड तोड्दै संसद भवनको रोटुन्डा सिँढीतर्फ अघि बढेका थिए।
पक्राउ परेकाहरूमा पूर्व सैनिक र सैनिक परिवारका सदस्यहरू रहेको अमेरिकी क्यापिटल प्रहरीले जानकारी दिएको छ। उनीहरूले राष्ट्रपति डोनाल्ड ट्रम्पले लस एन्जलसमा नेसनल गार्ड र सक्रिय ड्युटी मरिन खटाएको विरोधमा संसद भवनको सिँढीमा प्रदर्शन गर्ने योजना बनाएका थिए।
यो विरोध राष्ट्रपति ट्रम्पको ७९औँ जन्मदिनको अवसरमा शनिबार आयोजना गरिएको सैन्य परेडको पनि विरोधमा गरिएको थियो। करीब ७५ जना प्रदर्शनकारी सर्वोच्च अदालतअगाडि शान्तिपूर्ण रूपमा भेला भएका थिए।
प्रदर्शन सकिएपछि उनीहरू क्यापिटल क्षेत्र छोड्न लाग्दा प्रहरीले साइकल ब्यारिकेड राखेर सुरक्षा घेरा बनाउन थालेको थियो। प्रहरीका अनुसार, “केही व्यक्तिले ब्यारिकेड ढालेर गैरकानुनी रूपमा सुरक्षा घेरा पार गर्दै संसद भवनको रोटुन्डा सिँढीतिर दौडिए।” प्रहरीहरूले तुरुन्तै उनीहरूलाई रोकेर पक्राउ गरेको थियो।
प्रहरीले सबै पक्राउ परेकाहरूलाई “गैरकानुनी प्रदर्शन र प्रहरी घेरा उल्लंघन” को अभियोगमा मुद्दा लगाउने बताएको छ। साथै, केहीमाथि “प्रहरीमाथि आक्रमण” र “पक्राउ प्रक्रियामा अवरोध” जस्ता थप अभियोग पनि लगाइनेछ।
विरोध प्रदर्शनमा र्याली र पत्रकार सम्मेलन पनि गरिएको थियो।
शनिबार अमेरिकी सेनाको २५० औँ वार्षिकोत्सवको अवसरमा वाशिङ्टन डीसीमा सयौँ हजार मानिसको सहभागी हुने अपेक्षा गरिएको छ। यस अवसरमा आयोजना हुने सैन्य परेडमा सैनिकहरू, विमानहरू र अन्य सैन्य उपकरणहरू प्रदर्शित हुनेछन्। परेडको अनुमानित लागत ४५ मिलियन डलर रहेको छ।
परेडमा १८ माइल लामो सुरक्षा बार, ड्रोन निगरानी, स्नाइपर र हजारौँ सुरक्षाकर्मी परिचालित रहने अमेरिकी गोप्य सेवाले जनाएको छ।
उनीहरूले लस एन्जलस र देशभर भइरहेका विरोध प्रदर्शनहरूलाई नजिकबाट निगरानी गरिरहेको बताएका छन्। तर, हालसम्म परेड र अन्य कार्यक्रमहरूलाई लक्षित कुनै सक्रिय खतरा नदेखिएको अधिकारीहरूले बताएका छन्।