क्यानडाली नागरिकसमेत सवार भारतमा भएको विमान दुर्घटनाले क्यानडाका प्रधानमन्त्री स्तब्ध
प्रकाशित मिति : २९ जेष्ठ २०८२, बिहिबार
भारतको गुजरातको अहमदाबाद शहरमा एयर इन्डियाको एक विमान दुर्घटनाग्रस्त भएपछि अन्तर्राष्ट्रिय समुदायमा चिन्ता व्यक्त गरिएको छ। दुर्घटनाग्रस्त विमानमा २४२ जना यात्रु सवार थिए, जसमा एक क्यानडाली नागरिकसमेत थिए। क्यानडाका प्रधानमन्त्री मार्क कार्नीले यस घटनाप्रति गहिरो दुःख व्यक्त गरेका छन्।
प्रधानमन्त्री कार्नीले सामाजिक सञ्जाल एक्समा लेख्दै भने, ‘अहमदाबादबाट लन्डनतर्फ जाँदै गरेको एयर इन्डियाको विमान दुर्घटनाग्रस्त भएको खबरले म अत्यन्त स्तब्ध छु। उक्त विमानमा एक क्यानडाली नागरिकसहित २४२ जना सवार थिए। म दुर्घटनामा परेका सबै यात्रु तथा उनीहरूका परिवारजनप्रति समवेदना प्रकट गर्न चाहन्छु।’
कार्नीले थप जनाएअनुसार क्यानडाका यातायात अधिकारीहरू हाल भारतीय अधिकारीहरूसँग सम्पर्कमा छन् र घटनाको अनुसन्धानमा समन्वय गरिरहेका छन्।
एयर इन्डियाद्वारा जारी गरिएको औपचारिक विज्ञप्तिका अनुसार, उक्त विमानमा १६९ जना भारतीय नागरिक, ५३ जना बेलायती नागरिक, १ जना क्यानडाली नागरिक र ७ जना पोर्चुगलका नागरिक थिए । उक्त दुर्घटनामा हालसम्म २०४ जनाको मृत्यु भएको पुष्टि भएको छ।
हाल दुर्घटनाको कारणको बारेमा विस्तृत विवरण आइसकेको छैन। भारतीय उड्डयन प्राधिकरण र एयर इन्डियाको संयुक्त टोली घटनास्थलमा पुगेर अनुसन्धान प्रारम्भ गरिसकेको जनाइएको छ। स्थानीय प्रशासन, सुरक्षा बल तथा उद्धार टोली घटनास्थलमा सक्रिय छन्।
अहमदाबाद विमानस्थल नजिकै रहेका प्रत्यक्षदर्शीहरूले ठूलो आवाजसहित विमान धर्तीमा ठोक्किएको बताएका छन्। उद्धार कार्यमा संलग्न एक अधिकारीका अनुसार, विमान अवतरणको क्रममा असन्तुलित भएको देखिएको थियो।