न्यूयोर्कको ब्रुकलिन पुलमा पानी जहाज ठोक्किँदा २२ जना घाइते
प्रकाशित मिति : जेष्ठ ३, २०८२ शनिबार
अमेरिकाको न्यूयोर्क सिटीमा मेक्सिकन नेभीको एउटा अग्लो तालिम जहाज ब्रुकलिन पुलमा ठोक्किँदा कम्तीमा २२ जना घाइते भएका छन् । घाइते मध्ये तीन जनाको अवस्था गम्भीर रहेको मेक्सिकन नेभीले जनाएको छ।
पुलमुनि बाटो पार गर्दै गर्दा जहाजका अग्ला मस्तुलहरू पुलमा ठोक्किएको दृश्य सार्वजनिक भएको छ। मस्तुलहरू ठोक्किँदा त्यसका केही भाग डेकमा खसेका थिए ।
त्यो समयमा जहाजका चालक दलका सदस्यहरू मस्तुलमा थिए । जसकारण धेरै मानिसहरू घाइते भएको अमेरिकी सञ्चारमाध्यमहरूले जनाएका छन्।
न्यूयोर्क सिटीको इमर्जेन्सी म्यानेजमेन्टले घटनामा प्रतिक्रिया दिएको जनाएको छ । तर थप विवरण भने दिएको छैन । न्यूयोर्कका मेयर एरिक एडम्सले ब्रुकलिन पुलमा कुनै संरचनागत क्षति नभएको पुष्टि गरेका छन्।
मेक्सिकन नेभीले जहाज क्षतिग्रस्त भएको पुष्टि गर्दै घटनाको अनुसन्धान भइरहेको जनाएको छ। जहाजको यात्रा हेर्न भेला भएका मानिसहरू मस्तुल पुलमा ठोक्किएपछि डरले भागेका थिए।
न्यूयोर्क सिटीको फायर डिपार्टमेन्टले घाइतेहरूको उपचार भइरहेको जनाएको छ। यद्यपि घाइतेहरू पुलमा थिए कि जहाजमै भन्ने पुष्टि भइसकेको छैन।
न्यूयोर्क प्रहरी ले ब्रुकलिन ब्रिज, साउथ स्ट्रिट सीपोर्ट म्यानह्याटन र डुम्बो ब्रुकलिन क्षेत्रबाट टाढै रहन सर्वसाधारणलाई आग्रह गरेको छ।
जहाजमा २०० भन्दा बढी चालक दल सवार रहेको बताइएको छ। यो जहाज मैत्रीपूर्ण भ्रमणका क्रममा न्यूयोर्क आएको हो।
