क्यानडाको श्रम बजारमा सुस्तता, बेरोजगारी दरमा निरन्तर वृद्धि
प्रकाशित मिति : बैशाख २७, २०८२ शनिबार
क्यानडाको बेरोजगारी दर अप्रिल महिनामा ० दशमलव २ प्रतिशत अङ्कले वृद्धि भई ६ दशमलव ९ प्रतिशतमा पुगेको छ ।
यसअघि मार्चमा पनि ० दशमलव १ प्रतिशत अङ्कको वृद्धिसँगै बेरोजगारी दर बढेको राष्ट्रिय तथ्याङ्क निकाय स्ट्याटिस्टिक्स क्यानडाले शुक्रबार जानकारी दिएको छ ।
यो वृद्धिसँगै बेरोजगारी दर सन् २०२४ को नोभेम्बरमा पुगेको स्तरमा फर्किएको हो, जुन जनवरी २०१७ यताकै उच्चतम दर हो ।
निकायका अनुसार, अप्रिल महिनामा रोजगारी खोजिरहेका व्यक्तिहरूले अघिल्लो वर्षको तुलनामा अझै बढी कठिनाइको सामना गर्नु परेको देखिएको छ ।
मार्चमा बेरोजगार रहेका ६१ प्रतिशत व्यक्ति अप्रिलमा पनि बेरोजगार नै रहेका थिए, जुन अघिल्लो वर्षको तुलनामा उच्च अनुपात हो ।
अप्रिलमा समग्र रोजगारीमा खासै परिवर्तन देखिएन भने रोजगारी दर ० दशमलव १ प्रतिशत अंकले घटेर ६० दशमलव ८ प्रतिशतमा झरेको बताइएको छ ।
१५ देखि ६९ वर्ष उमेर समूहका कर्मचारीहरूमध्ये १३ दशमलव २ प्रतिशतले आफ्नो कार्यस्थलमा आगामी छ महिनाभित्र कर्मचारी सङ्ख्या घट्ने अपेक्षा व्यक्त गरेका छन् ।
यस्तै, अमेरिकी मागमा निर्भर क्यानाडेली निर्यात उद्योगमा कार्यरत कर्मचारीहरूमध्ये यो अनुपात १८ दशमलव ६ प्रतिशत रहेको स्ट्याटिस्टिक्स क्यानडाले जनाएको छ ।