कोरोनाभाइरस उत्पत्तिको अबको अनुसन्धान अमेरिका केन्द्रित हुनुपर्ने चीनको भनाई
प्रकाशित मिति : बैशाख १९, २०८२ शुक्रबार
चीनले कोभिड १९ अमेरिका बाट सुरु भएको हुन सक्ने दाबी पुनः दोहोर्याएको छ । श्वेत पत्र सार्वजनिक गर्दै चीनले अमेरिकामाथि यो आरोप दोहोराएको हो ।
अमेरिकी राष्ट्रपति डोनाल्ड ट्रम्पको प्रशासनले कोभिड १९ चीनको प्रयोगशालाबाट निस्किएको भनेर आरोप लगाइरहेका बेला चीनले आफनो बचाउ गरेको छ ।
सार्वजनिक गरेको श्वेत पत्रमा कोरोनाभाइरसको उत्पत्तिको जिम्मेवारी अमेरिकामाथि लगाउँदै आफ्नो बचाउ गरेको छ ।
सरकारी समाचार संस्था सिन्ह्वा मार्फत प्रकाशित गरिएको श्वेत पत्रमा चीनले कोभिड १९ को उत्पत्तिको विषयलाई अमेरिकाले राजनीतिकरण गरिरहेको आरोप लगाएको हो ।
उक्त रिपोर्टमा मिसौरी राज्यद्वारा दायर एक मुद्दाको पनि उल्लेख गरिएको छ । मुद्धामा चीनमाथि स्वास्थ्य सामग्री जम्मा गरेको र भाइरसको फैलावट लुकाएको आरोपमा २४ बिलियन डलर जरिवाना लगाइएको थियो ।
चीनले भने आफूले विश्व स्वास्थ्य संगठन र अन्तर्राष्ट्रिय समुदायसँग समयमै सम्बन्धित जानकारीहरू साझा गरेको बताएको छ ।
श्वेत पत्रमा चीन विश्व स्वास्थ्य संगठन सँगको संयुक्त अध्ययनले प्रयोगशालाबाट भाइरस निस्किएको सम्भावना नरहेको निष्कर्ष निकालेको पनि उल्लेख छ ।
पर्याप्त प्रमाणहरूले देखाउँछन् कि कोभिड १९ अमेरिका भित्र सरकारद्वारा दाबी गरिएको समयभन्दा पहिले नै देखा परेको थियो । यो भाइरस चीनमा फैलिनुअघि नै देखा परेको हुन सक्छ भनेर चीनले दावी गरेको छ ।
अमेरिकी केन्द्रीय गुप्तचर संस्था सीआईए ले सन् २०२५ को जनवरीमा दिएको नयाँ मूल्याङ्कनमा महामारीको उत्पत्ति चीनको प्रयोगशालाबाट भएको सम्भावना प्राकृतिक उत्पत्तिको भन्दा बढी रहेको उल्लेख गरिएको छ ।
तर, उक्त मूल्याङ्कनमा कम आत्मविश्वास रहेको र प्रयोगशाला वा प्राकृतिक उत्पत्ति दुबै सम्भावना यथावत् रहेको स्वीकार गरिएको थियो ।
सिन्ह्वाले उद्धृत गरेअनुसार चीनको राष्ट्रिय स्वास्थ्य आयोगका एक अधिकारीले अबको अनुसन्धान अमेरिका केन्द्रित हुनुपर्ने बताएका छन् ।