नेपालबाट एक वर्षमा ५४ अमेरिकी नागरिकलाई देशनिकाला, चिनियाँपछि दोस्रो स्थान
नेपालमा भिसा अवधि नाघेर बस्ने विदेशी नागरिकको संख्या बढ्दै गएको छ, जसमा चिनियाँ र अमेरिकी नागरिक अग्रस्थानमा छन्। नेपालको अध्यागमन विभागका अनुसार सन् २०२४ मा ५४ अमेरिकी नागरिकलाई भिसा अवधि नाघेको कारण देशनिकाला गरिएको छ, जुन चिनियाँ नागरिकपछि दोस्रो ठूलो समूह हो।
सोही वर्ष १४१ चिनियाँ नागरिकलाई भिसा उल्लंघनको कारण स्वदेश फिर्ता गरिएको थियो, जुन भिसा अवधि नाघ्नेहरूको सबैभन्दा ठूलो संख्या हो। पर्यटक, पदयात्री र आध्यात्मिक खोजीमा आउनेहरूका लागि लोकप्रिय गन्तव्य नेपालमा भिसा नियम पालना नगर्ने विदेशी नागरिकको संख्या बढ्दो छ।
अध्यागमन विभागका अनुसार बंगलादेशी नागरिक तेस्रो स्थानमा छन्, जसमा ५१ जनालाई सन् २०२४ मा देशनिकाला गरिएको थियो। त्यस्तै, ३० पाकिस्तानी र २७ बेलायती नागरिकलाई पनि भिसा अवधि नाघेको कारण फिर्ता पठाइयो।
नेपालले विदेशी नागरिकलाई विभिन्न प्रकारका भिसा प्रदान गर्छ, जसमध्ये पर्यटक भिसा सबैभन्दा आम प्रकारको हो। पर्यटक भिसा सामान्यतया १५, ३० वा ९० दिनका लागि जारी गरिन्छ र एक वर्षमा अधिकतम १५० दिन बस्न अनुमति दिइन्छ। त्रिभुवन अन्तर्राष्ट्रिय विमानस्थल वा अन्य प्रवेश बिन्दुमा भिसा अन अराइभल प्राप्त गर्न सकिन्छ। भिसा विस्तार गर्न काठमाडौं वा पोखरास्थित अध्यागमन कार्यालयमा पासपोर्ट, हालैको फोटो र लाग्ने शुल्कसहित पुग्नुपर्छ।
भिसा अवधि नाघेमा प्रति दिन ३ अमेरिकी डलर जरिवाना लाग्छ र गम्भीर अवस्थामा देशनिकाला वा पुन प्रवेशमा प्रतिबन्ध जस्ता कडा सजाय हुन सक्छ। अध्यागमन विभागले विदेशी नागरिकलाई भिसा नियमको कडाइका साथ पालना गर्न र समयमै भिसा विस्तार गर्न आग्रह गरेको छ। यद्यपी जानाजानी भिसा नाघ्ने समस्या कायमै छ।
आफ्नो देशमा आपराधिक गतिविधिमा संलग्न भएको आरोप लागेका केही विदेशी नागरिक पनि नेपाललाई लुक्ने ठाउँको रूपमा प्रयोग गरिरहेका घटनाहरु सार्वजनिक हुने गरेका छन् । यसले अध्यागमन कानूनको कार्यान्वयन र विदेशी आगन्तुकको अनुगमनमा चिन्ता बढाएको छ।
नेपालको उदार भिसा नीति र सांस्कृतिक तथा प्राकृतिक आकर्षणले वार्षिक रूपमा लाखौं आगन्तुकहरु आउने गर्छन् । नेपाल पर्यटन बोर्डको पछिल्लो तथ्यांकअनुसार सन् २०२५ को मार्चमा १ लाख २१ हजार ८०० विदेशी पर्यटक नेपाल आएका थिए । मार्चमा भारत पहिलो स्थानमा रह्यो । भारतबाट मार्चमा २१,४१२ पर्यटक नेपाल आएका थिए । चीन दोस्रो स्थानमा रह्यो । चीनबाट ११,४४३ पर्यटक नेपाल आएका थिए । तेश्रो स्थानमा रहेको अमेरिकाबाट ११,०१२ पर्यटक नेपाल आएका थिए ।
नेपाल पर्यटन बोर्डको प्रतिवेदनअनुसार सन् २०२५ को पहिलो तीन महिनामा पर्यटन क्षेत्र असाधारण रूपमा बलियो रह्यो, जसमा कुल २,९८,००० विदेशी आगन्तुक आए। जनवरीमा ७९,९०० पर्यटक आए भने फेब्रुअरीमा ९६,८०० यात्रुले नेपाल भ्रमण गरे, जसमा १०,३४८ अमेरिकी थिए।
