किन ग्राहकले रुचाउनै छाडे एलन मस्कको ‘टेस्ला’ ? १३ प्रतिशतले घट्यो कारोबार
प्रकाशित मिति : चैत्र २०, २०८१ बुधबार
विश्व प्रसिद्ध विद्युतीय सवारी निर्माता टेस्लाको पहिलो त्रैमासिक बिक्री १३ प्रतिशतले घटेको छ। यो पछिल्लो तीन वर्षमा कम्पनीको सबैभन्दा कमजोर प्रदर्शन हो। सीईओ एलन मस्कको राजनीतिक झुकावका कारण टेस्लाले पछिल्लो समय ठूलो आलोचना खेपिरहेको छ भने उपभोक्ताहरू प्रतिस्पर्धी कम्पनीका नयाँ मोडेलतर्फ आकर्षित भएका छन्।
टेस्लाको कमजोर बिक्रीले कम्पनीले लामो समयदेखि आफ्नो सवारी मोडेलहरू नविकरण नगरेको कारण देखिएको बताइएको छ। त्यस्तै, अमेरिका र युरोपमा मस्कको राजनीतिमा सक्रियताले उपभोक्तामा नकारात्मक असर परेको छ। कम्पनीले युरोप र चीन जस्ता प्रमुख बजारहरूमा कमजोर बिक्री देखाएको छ, जबकि विद्युतीय सवारीप्रति आकर्षण बढिरहेको छ।
अमेरिकामा संघीय लागत कटौतीको नेतृत्व गर्ने मस्कको भूमिका र जर्मनी र अन्य राष्ट्रहरूमा अति-दक्षिणपन्थी दलहरूको समर्थनले विश्वभर तीव्र प्रतिक्रिया उत्पन्न गरेको छ। हालैका महिनाहरूमा टेस्लाका गाडी र डिलरशिपहरू तोडफोडका निशाना बनेका छन्। केही टेस्ला मालिकहरूले मस्कको नामसँग सम्बन्धित हुन नचाहेर आफ्नो गाडी फेरेका छन् ।
मंगलबार, विस्कनसिन राज्यको सर्वोच्च अदालतको निर्वाचनमा वामपन्थी झुकाव राख्ने न्यायाधीश विजयी भए। मस्कले उनको प्रतिद्वन्द्वीलाई समर्थन गर्न २० मिलियन अमेरिकी डलरभन्दा बढी खर्च गरेका थिए। यस घटनापछि स्थानिय बासिन्दाहरूले ‘लोकतन्त्र बिक्रीका लागि होइन’ भन्दै विरोध प्रदर्शन गरेका थिए ।
युरोपेली बजारमा किन खस्कियो एलन मस्कको ‘टेस्ला’को कारोबार ?
बिक्रीमा आशा भन्दा ठूलो गिरावट
जनवरी-मार्च अवधिमा टेस्लाले ३ लाख ३६ हजार ६८१ गाडी बिक्री गरेको छ, जुन गत वर्षको ३८६,८१० एकाइको तुलनामा कम हो। विश्लेषकहरूले औसत रूपमा ३७२,४१० गाडी डेलिभरी हुने अनुमान गरेका थिए, तर वास्तविक परिणाम झनै कमजोर रह्यो।
वेडबश सेक्युरिटीजका विश्लेषक ड्यान आइभ्सले भने, ‘हामी यी संख्यालाई राम्रो देख्ने चस्माबाट हेर्न सक्दैनौं । यो प्रत्येक सूचकांकमा एक विपत्ति थियो। बजारले खराब त्रैमासिकको अपेक्षा गरेको थियो, तर यो झनै खराब रह्यो।’
बुधबार टेस्लाको शेयर २ प्रतिशतले घट्यो, जसले डिसेम्बरदेखि देखिएको कमजोरीलाई निरन्तरता दियो। यसले कम्पनीको बजार मूल्य करिब ४५ प्रतिशतले घटाएको छ।
गत वर्ष, मस्कले २०२५ मा २० प्रतिशत देखि ३० प्रतिशत बिक्री वृद्धिको भविष्यवाणी गरेका थिए। उनले पहिलो ६ महिनामा सस्तो मूल्यको विद्युतीय गाडी ल्याउने वाचा गरेका थिए। तर, चीनको बीवाईडी कम्पनीले टेस्लालाई उछिन्दै विश्वकै सबैभन्दा ठूलो विद्युतीय गाडी निर्माता बन्ने सम्भावना बढ्दै गएको छ।
काउन्टरप्वाइन्ट रिसर्चका अनुसार, बीवाईडीको बजार हिस्सा १५ दशमलव ७ प्रतिशत पुग्ने अनुमान गरिएको छ, जबकि टेस्लाको १५ दशमलव ३ प्रतिशतमा सीमित रहनेछ।
हर्ग्रिभ्स ल्यान्सडाउनका वरिष्ठ विश्लेषक म्याट ब्रिट्जम्यानले भने, ‘टेस्लाको पहिलो त्रैमासिक डेलिभरी संख्या निराशाजनक छ। धेरै लगानीकर्ताहरू नराम्रो संख्याको अपेक्षा गरिरहेका थिए, तर गिरावटको स्तर अपेक्षा भन्दा पनि खराब रह्यो।’