पाँच लाखभन्दा बढी बालबालिकामा घातक कुपोषण
प्रकाशित मिति : चैत्र १२, २०८१ मंगलबार
यमनका पाँच वर्षमुनिका आधा बालबालिका कुपोषित भएको संयुक्त राष्ट्रसङ्घले बताएको छ ।
संयुक्त राष्ट्रसङ्घका अनुसार यमनमा पाँच वर्षमुनिका प्रत्येक दुईमध्ये एक बालबालिका गम्भीर कुपोषणको शिकार भएका छन् । तीमध्ये पाँच लाखभन्दा बढी घातक कुपोषणबाट प्रभावित छन् ।
संयुक्त राष्ट्रसङ्घीय बाल एजेन्सी युनिसेफले यमनमा एक दशकदेखि चलिरहेको द्वन्द्वले बाल्यकाल खोसेको र एउटा सम्पूर्ण पुस्तालाई बाँच्नको लागि सङ्घर्ष गर्न बाध्य पारेको चेतावनी दिएको छ ।
त्यहाँ मानवीय सङ्कट पनि बढ्दै गइरहेको छ । “पाँच वर्ष मुनिका दुई मध्ये एक बालबालिका तीव्र कुपोषित छन्,” युनिसेफका यमन प्रतिनिधि पिटर हकिन्सले जेनेभामा आयोजित पत्रकार सम्मेलनमा भनेका छन ।
“ती मध्ये पाँच लाख ३७ हजार भन्दा बढी बालबालिकाहरू गम्भीर तीव्र कुपोषणबाट ग्रस्त छन् । यो अवस्था पीडादायी रहेको छ,” उनले भने ।
“कुपोषणले प्रतिरक्षा प्रणालीलाई कमजोर बनाउँछ, विकास रोक्छ,” हकिन्सले उल्लेख गरे ।
यमनमा यो केवल स्वास्थ्य सङ्कट मात्र होइन । यो हजारौंको लागि पनि मृत्युदण्ड हो । यमनका हुथी विद्रोहीले देशको ठूलो भूभाग कब्जा गरेका छन् ।
उनीहरू सन् २०१५ देखि अन्तर्राष्ट्रिय रूपमा मान्यता प्राप्त सरकारलाई समर्थन गर्ने साउदी नेतृत्वको गठबन्धनसँग युद्धमा छन् । जसले ठूलो मानवीय सङ्कट निम्त्याएको छ ।
हकिन्सले पश्चिमी तटका केही क्षेत्रहरूमा गम्भीर कुपोषणको स्तर ३३ प्रतिशत पुगेको जानकारी दिए । यो एक प्रकोप हो, जसमा हजारौं मानिस मर्नेछन् उनले भनेका छन ।