राजदूत वलीद्वारा लाओसका राष्ट्रपतिसमक्ष ओहोदाको प्रमाणपत्र पेस
प्रकाशित मिति : फाल्गुन २२, २०८१ बिहीबार
थाइल्यान्डको लागि नेपाली राजदूत धनबहादुर वलीले लाओसका राष्ट्रपतिसमक्ष ओहोदाको प्रमाणपत्र पेस गरेका छन् ।
लाओसको राजधानी भेन्टियानमा रहेको राष्ट्रपति भवनमा एक कार्यक्रमकाबीच लाओस् जनवादी गणतन्त्र (पीडीआर)का राष्ट्रपति थोंगलुन सिसोलिथसमक्ष नेपालका असाधारण र पूर्णाधिकारी राजदूतको रूपमा वलीले आफ्नो ओहोदाको प्रमाणपत्र प्रस्तुत गरेका हुन् ।
ओहोदाको प्रमाणपत्र प्रस्तुत गरेपछि राजदूत राष्ट्रपतिसँग शिष्टाचार भेटवार्ता गरेका थिए ।
सो क्रममा राजदूत वलीले नेपालका राष्ट्रपति रामचन्द्र पौडेल र नेपालीको तर्फबाट राष्ट्रपतिको सुस्वास्थ्य र खुसीसँगै लाओस् पीडीआरका जनताको निरन्तर प्रगति र समृद्धिको लागि अभिवादन र शुभकामना व्यक्त गरे ।
यस्तै, लाओसका राष्ट्रपति सिसोलिथ सिसोलिथले राजदूतलाई बधाई दिँदै नेपालका राष्ट्रपतिको व्यक्तिगत सुस्वास्थ्य र खुसीको साथै नेपालीहरूको प्रगति र समृद्धिको लागि शुभकामना व्यक्त गरे । उनले आगामी दिनहरूमा दुई देशहरू बिचको मैत्रीपूर्ण, सौहार्दपूर्ण र सहयोगात्मक सम्बन्ध अझ सुदृढ हुने विश्वास समेत व्यक्त गरे ।
सो अवसरमा राजदूत वलीले परराष्ट्र मन्त्री थोङ्साभान्ह फोम्विहाने, परराष्ट्र उपमन्त्री मेथोङ थाम्माभोङ्सा र उच्च सरकारी अधिकारीसँग शिष्टाचार भेटवार्ता गरेका थिए । भेटघाटका क्रममा दुई देशहरू बीच व्यापार, पर्यटन, शिक्षा, जनस्वास्थ्य क्षेत्रमा सहयोग प्रवर्द्धन गर्ने लगायत द्विपक्षीय सम्बन्धका विभिन्न पक्षहरूमा छलफल भएको बैंककस्थित नेपाली राजदूतावासले जनाएको छ ।