ट्रम्पको पदभारपछि अमेरिकाबाट २७ नेपाली देशनिकाला, विस्तृत विवरणसहित (एक्सक्लुसिभ)
प्रकाशित मिति : फाल्गुन १९, २०८१ सोमबार
अमेरिकी राष्ट्रपति डोनाल्ड ट्रम्पले आफ्नो दोस्रो कार्यकाल सम्हालेदेखि अमेरिकाबाट २७ जना नेपाली देशनिकाला भएका छन् । गत जनवरी २० मा ट्रम्पले राष्ट्रपतिको पदभार सुरुगरेदेखि अमेरिकाबाट देशनिकालामा परेका २७ नेपालीमध्ये ४ जना महिला र २३ जना पुरुष रहेका छन् ।
त्रिभुवन अन्तर्राष्ट्रिय विमानस्थल अध्यागमन कार्यालयले खसोखासलाई दिएको जानकारी अनुुसार जनवरी २२ देखि ३१ सम्म ६ जना नेपाली देशनिकाला भएकोमा फेब्रुअरी महिनामा २० जना नेपाली देशनिकाला भएका हुन् । यस्तै, मार्च अहिलेसम्म एक जना नेपाली देशनिलाका भएका छन् ।
अध्यागमन कार्यालयका अनुसार गत जनवरी २२, २४ र २९ मा एक/एक जना नेपाली अमेरिकाबाट नेपाल दिेशनिलाका भएर नेपाल पुगेका थिए । यस्तै, जनवरी ३० मा दुई जना र जनवरी ३१ मा एकजना नेपाली देशनिकाला भएर नेपाल पुगेका थिए ।
यस्तै, फेब्रअरी एक र फेब्रुअरी ५ मा तीन/ तीन जना, फेब्रुअरी ६ मा दुई जना, फेब्रुअरी ८ मा ६ जना, फेब्रुअरी १६ मा दुई जना नेपाली अमेरिकाबाट देशनिकाला भएर नेपाल पुगेका थिए । त्यस्तै, फेब्रुअरी १७, १९, २० र २४ गते एक/एक जना देशनिकाला भएर नेपाल पुगेका थिए भने भने मार्च २ मा एक नेपाली देशनिकाला भएर नेपाल पुगेका थिए ।
देशनिकाला हुनेहरुमध्ये ६ जनासँग सन् २०२१ भन्दा अगाडि जारी भएको पासपोर्ट रहेको थियो भने १० जनासँग सन् २०२१ पछि जारी भएको नयाँ पासपोर्ट रहेको थियो । त्यस्तै ११ जनासँग वासिंटन डिसीमा रहेको नेपाली दूतावासले जारी गरेको ट्राभल डकुमेन्ट रहेको थियो ।
तर त्यसमध्ये अधिकांश ट्रम्प प्रशासन सुरु हुनुभन्दा अगाडि नै देशनिकालाका लागि वासिंटन डिसीमा रहेको दूतावासले ट्राभल डकुमेन्टहरु बनाइदिएकाहरु छन् । किनभने ट्रम्प प्रशासन सुरु भएपछि दूतावासले जम्मा आधा दर्जनमात्र ट्राभल डकुमेन्टहरु जारी गरेको जनाएको छ । जसमध्ये केहीलाई आइसले अझै देशनिकाला गरिसकेको छैन ।
यीबाहेक ३ जना नेपालीहरुलाई अमेरिकाले पनामा देशनिकाला गरेको छ । त्योसँगै अमेरिकाबाट देशनिकाला हुने नेपालीहरुको कुल संख्या भने ट्रम्प प्रशासन अन्तरगत ३० पुगेको छ ।
ट्रम्प प्रशासन सुरु भइसकेपछि आइसले अहिलेसम्म कतिजना नेपालीहरुलाई पक्राउ गरेको छ भन्नेबारे यकिन विवरण प्राप्त भएको छैन । त्यस्तै बाइडेन प्रशासनका पछिल्ला ४ महिना १ अक्टोबर २०२४ देखि २० जनवरी २०२५ सम्म कतिजना नेपालीहरुलाई अमेरिकाबाट देशनिकाला गरिएको थियो भन्नेबारे यकिन विवरण आइसबाट अझै प्राप्त भएको छैन ।
यस अगाडि बाइडेन प्रशासनको ४ आर्थिक बर्षमा गत सेप्टेम्बरसम्म अमेरिकामा १३२ जना नेपालीहरुलाई आइसले पक्राउ गरेको थियो भने १३० जनालाई डिपोर्ट गरेको थियो । त्योबाहेक सिमाक्षेत्रमा सीबीपीले पक्राउ गरेर आइसको हिराशतमा पठाएका नेपालीहरुको संख्या २७ सयभन्दा बढी रहेको थियो । आइसको रिपोर्ट अनुशार ४ बर्षको अवधिमा आइसको हिराशतमा २८९१ जना नेपालीहरु परेका थिए ।
आइसले बाइडेन कार्यकालको पहिलो बर्ष आर्थिक बर्ष २०२१ मा ११, २०२२ मा ३०, २०२३ मा ५६ र २०२४ मा ३५ जना नेपालीहरुलाई अमेरिकाका विभिन्न क्षेत्रबाट पक्राउ गरेको थियो । जसमध्ये २०२४ मा १० जना नेपालीहरु विभिन्न अपराधमा दोषी ठहरिएकाहरु थिए भने २०२३ मा पक्राउ परेकाहरुमा ११ जना विभिन्न अपराधमा दोषी ठहरिएकाहरु रहेको आइसले जनाएको छ ।
त्यस्तै विनाभिसा सिमा पार गर्ने क्रममा सीबीपी लगायतले पक्राउ गरेर आइसको हिराशतमा राखिएका र आइस आफैले अमेरिकाभित्र पक्राउ गरेका नेपालीहरु आर्थिक बर्ष २०२४ मा ७१० जना, २०२३ मा ८३५ जना, २०२२ मा ९६२ जना र २०२१ मा ३८४ जना रहेका थिए ।
पक्राउ पछि आइसले विमानमार्फत देशनिकाला गरेका नेपालीहरु आर्थिक बर्ष २०२१ मा २३ जना, २०२२ मा २८ जना, २०२३ मा २२ जना र २०२४ मा ५७ जना गरी कुल १३० जना रहेका थिए ।
बाइडनको कार्यकालमा लगभग ९ हजार नेपालीहरु विनाभिसा अमेरिका प्रवेश गरेको डिपार्टमेन्ट अफ होमल्याण्ड सेक्युरिटीको तथ्यांकले देखाएको छ । तर सबै नेपालीहरुलाई आइसको हिराशतमा पठाइएको थिएन । केबल झण्डै २८ सय नेपालीहरुलाई मात्र आइसको हिराशतमा पठाइएको थियो ।
अघिल्लो ट्रम्प प्रशासन अन्तर्गतको चार वर्षमा कुल १,८५० नेपालीहरु यसरी विना भिसा अमेरिका प्रवेश गरेका थिए । त्यसको तुलनामा बाइडेनकालमा विनाभिसा प्रवेश गर्नेहरुको संख्यामा झण्डै ५ गुणा बृद्धि भएको थियो । २०२३ को अक्टोबरबाट सुरु भएको र २०२४ को सेप्टेम्बरमा समाप्त भएको आर्थिक बर्ष २०२४ मा सबैभन्दा धेरै ३६९० जना नेपालीहरु विनाभिसा अमेरिका प्रवेश गरेको तथ्यांकले देखाएको छ ।
आर्थिक बर्ष २०२५ सुरु भइसकेपछि गत अक्टोबरमा ४४० र नोभेम्बरमा ३ सय नेपालीहरु विनाभिसा अमेरिका प्रवेश गरेको तथ्यांक डिपार्टमेन्ट अफ होमल्याण्ड सेक्युरिटीले सार्वजनिक गरेको थियो । आर्थिक बर्ष २०२३ मा ३१४० जना नेपालीहरु विनाभिसा अमेरिका प्रवेश गरेका थिए । आर्थिक बर्ष २०२२ मा १४९० र २०२१ मा ४२० जना नेपालीहरु विनाभिसा अमेरिका प्रवेश गरेका थिए ।
(काठमाडौंबाट सुरज घिमिरे र दीपेन्द्र ढुंगानाको थप रिपोर्टिङ)