सन २०२४ मा १२ लाख पर्यटकले लुम्बिनी भ्रमण गरे, ३ महिनामै दानपेटिकामा १ करोड ४३ लाख संकलन
प्रकाशित मिति : पुस २४, २०८१ बुधबार
बुद्ध जन्मस्थल लुम्बिनीको मायादेवी मन्दिरमा राखिएको दानपेटिकाबाट ३ महिनामा झण्डै डेढ करोड रकम संकलन भएको छ ।
लुम्विनी विकास कोषका कोषाध्यक्ष दुण्डीराज भट्टराईका अनुसार दानपेटिकाबाट १ करोड ४३ लाख ५९ हजार ९९० रुपैया संकलन भएको हो ।
यो रकम असोज महिनायताको भएको कोषाध्यक्ष भट्टराईले बताउनु भयो । आर्थिक बर्ष २०८१।०८२ सुरु भएपछि दोश्रो पटक दानपेटिकाको रकम गणना गरिएको हो ।
पुसको १८ देखि २३ गतेसम्म ५ दिन लगाएर ३२ जना कर्मचारीले भेटिका रुपमा दान गरिएको रकमको गणना गरेका थिए ।
असोजको ११ देखि १३ गतेसम्म यस आर्थिक बर्षको पहिलो पटक रकम गणना गरिएको थियो ।
रकम गणना गर्दा सीसीटीवी क्यामराको निगरानीमा गणना गर्ने गरिन्छ । मायादेवी मन्दिरको अवलोकन गर्न पुग्ने तिर्थयात्रुले श्रद्धापूर्वक भेटी चढाउने गर्दछन ।
दानपेटिकामा संकलित रकम लुम्बिनी विकास कोषको महत्वपूर्ण आम्दानीको श्रोत भएको कोषाध्यक्ष भट्टराईले जानकारी दिनुभयो ।
सन् २०२४ मा ११ लाख ७२ हजार ३०४ जनाले बुद्ध जन्मस्थल लुम्बिनीको भ्रमण गरेका छन् । अघिल्लो वर्षको तुलनामा १ लाख ७३ हजार ३६६ ले यो संख्या बढि हो ।
सन २०२३ मा ९ लाख ९८ हजार ९३८ जना लुम्बिनी आएका थिए । सन् २०२४ मा लुम्बिनी आएका मध्ये ७ लाख ५९ हजार ९९० जना आन्तरिक पर्यटक रहेको लुम्बिनी विकास कोषले जनाएको छ ।
२०२४ मा १ लाख १४ हजार ४२५ जना तेस्रो मुलुकका पर्यटक बुद्ध जन्मस्थलमा आएको लुम्बिनी विकास कोषले जनाएको छ । तेस्रो मुलुकका पर्यटकको आगमन ४६.३६ प्रतिसतले बढ्दा सुधार देखिएको छ ।
२०२३ मा ७६ हजार २१० राहदानी वाहक विदेशी पर्यटक लुम्बिनी आएका थिए । कोभिड अघि २०१९ मा १ लाख ७४ हजार १५ जना तेस्रो मुलुकका पर्यटक लुम्बिनी आएका थिए ।