उपचुनावको नतिजा सार्वजनिक : कांग्रेसलाई क्षति , माओवादीलाई फाइदा , रास्वपा निराश
प्रकाशित मिति : मंसिर १७, २०८१ सोमबार
मंसिर १६ गते सम्पन्न भएको पालिका उपचुनावको मतगणना को सम्पूर्ण परिणाम सार्वजनिक भएको छ ।
पालिकामा रिक्त विभिन्न ४२ पदका लागि उपचुनाव भएको थियो । एक मेयर, एक उपमेयर, दुई अध्यक्ष, चार उपाध्यक्ष र ३४ वटा वडाध्यक्षको लागि उपचुनाव भएको हो ।
४२ पदमध्ये समग्रमा कांग्रेसले १७, माओवादीले ११ र एमालेले ८ पद जित्दै क्रमस पहिलो , दोश्रो र तेश्रो स्थान प्राप्त गरेका छन ।
काठमाण्डौको कीर्तिपुरको मेयर पद कांग्रेसले जितेको छ । जाजरकोटको नलगाडमा उपमेयर माओवादीले जितेको छ । दैलेखको महाबु गाउँपालिका अध्यक्ष एमाले र मोरङको ग्रामथानमा अध्यक्ष माओवादी केन्द्रले जितेको छ ।
चार उपाध्यक्षमध्ये हुम्लाको सर्केगाड र रुकुमको पुथा उत्तरगंगामा माओवादी तथा बाजुराको स्वामीकार्तिक र दोलखाको गौरीशंकरमा एमालेका उम्मेदवार विजयी भएका छन् ।
रिक्त रहेका ३४ वडाध्यक्षमध्ये कांग्रेसले १६, माओवादी केन्द्रले निर्विरोधसहित ७, एमालेले ५ , जसपा नेपालले २ , रास्वपाले १ , एकीकृत समाजवादीले १ , नेमकिपाले १ र स्वतन्त्र उम्मेदवारले एक ठाउँमा जितेका छन् ।
रुकुमको पुथा उत्तरगंगा २ को वडाअध्यक्षमा माओवादीका उम्मेदवार निर्विरोध भएका थिए । यो चुनावमा अघिल्लो चुनावमा जितेका स्थानमा कांग्रेस , एमाले र माओवादीले गुमाएर केहि नयाँ ठाउँमा चुनाव जितेका देखिएको छ ।
अघिल्लो चुनावमा कांग्रेस , माओवादी संयुक्त रुपमा चुनाव लडेका थिए । यसपटक उनीहरु एक्ला एक्लै चुनावमा उत्रिएका थिए । यो चुनावमा कांग्रेसले क्षति व्यहोर्नु परेको छ । एक्लै प्रतिश्पर्धामा उत्रिएको बेला आएको यो नतिजा उत्साहजनक नै भएको कांग्रेसका नेताहरुले बताएका छन ।
माओवादी केन्द्रमा हौसाउने परिणाम आएको छ । एमालेले पनि सन्तोष मानेको छ । रास्वपालाई निराश बनाएको छ । राप्रपाको उपस्थिती नगन्य देखिएको छ । रास्वपाले काठमाण्डौ १६ मा वडाध्यक्ष जितेको भएपनि अन्य अधिकांश स्थानमा जमानत समेत जोगाउन नसकेको देखिएको छ ।