टर्की घुम्न चाहानुहुन्छ ? यी हुन् १० प्रमुख खुशी शहरहरू
प्रकाशित मिति : भाद्र ५, २०८१ बुधबार
टर्की प्राकृतिक सौन्दर्य र सांस्कृति सम्पदाको लागि प्रसिद्ध मानिन्छ । विश्वका सर्वाधिक भ्रमण गरिने सहरहरुमध्ये टर्कीका सहरहरु पनि पर्ने गर्छन् ।
अझ, सन् २०२३ को डिसेम्बरमा यूरोमोनिटर इन्टरनेशनलले जारी गरेको शीर्ष १०० गन्तव्य शहरहरूको रिपोर्टमा सबैभन्दा धेरै भ्रमण गरिएका चार शहरहरू मध्ये दुई टर्कीका दुई वटा शहर परेका थिए । ती दुई शहर इस्तानबुल र एन्टाल्या हुन् । सन् २०२३ मा अन्तर्राष्ट्रिय आगमनको संख्याको सूचीमा इस्तानबुल शीर्ष स्थानमा थियो । टर्कीले भिसामा समेत नरम नीति अपनाएपछि पर्यटकहरुको घूइँचो समेत लागेको छ ।
यसैबीचमा, टर्किस स्ट्याटिस्टिकल इन्स्टिच्युटले टर्कीका १० खुशी सहरहरुको सूची सार्वजनिक गरेको छ । सोमबार सार्वजनिक गरिएको रिपोर्टमा ब्ल्याक सी क्षेत्रको सिनोप खुशी सहरहरुको पहिलो नम्बरमा छ । जुन देशका ८१ प्रमुख सहरहरूमध्ये ७७ दशमलव ६६ प्रतिशतसहित शीर्ष स्थानमा छ।
यस्तै, ७६ दशमलव ४३ प्रतिशतसहित खुशी सहरहरुको दोस्रो नम्बरमा एजियन क्षेत्रको अफ्योन्काराहिसार छ भने एनाटोलिया सहर बेबर्ट ७५ दशमलव ९१ प्रतिशतका साथ तेस्रो स्थानमा छ । खुशी सहरहरुको चौथो स्थानमा ७५ दशमलव ४८ प्रतिशतसहित मध्य एनाटोलियाको किरिक्क, ७३ दशमलव ७६ प्रतिशतसहित पाचौँ स्थानमा एजियन क्षेत्रको कुटाह्या सहर, ७३ दशमलव ५ प्रतिशतसहित छैटौं स्थानमा मध्य अनातोलियाको कानकिरी, ७२ दशमलव ७७ प्रतिशत सातौं नम्बरमा ब्ल्याक सी सहर डुज्से परेको छ ।
त्यसैगरी, एजियन क्षेत्रमा रहेको उसाकले ७२ दशमलव ३४ प्रतिशतसहित आठौं नम्बरमा, ७१ दशमलव ६५ प्रतिशतको खुसी दरसहित दक्षिणपूर्वी एनाटोलियामा रहेको सिर्ट नवौं नम्बरमा छ भने ७१ दशमलव ३६ प्रतिशत दक्षिणपूर्वमा रहेको सिरनाकमा दशौं नम्बरमा परेको छ ।
रिपोर्टका अनुसार मध्य ब्ल्याक सी क्षेत्रलाई टर्कीमा सबैभन्दा खुशी सहरको रूपमा हाइलाइट गरिएको छ भने एजियन क्षेत्रले पनि उच्च स्तरको खुशी देखाएको हो । पर्यटकहरुको स्वदेशी तथा विदेशी यात्राहरु लगभग कोरोना महामारी पूर्वकै अवस्थामा फर्कदा त्यसको फाइदा टर्कीले उठाएको छ ।