अमेरिकामा झण्डै २ सतादेखि सम्पर्कविहीन नेपाली युवा अमन सकुशल फेला
प्रकाशित मिति : बैशाख २७, २०८१ बिहीबार
झण्डै २ सातादेखि बेपत्ता न्युयोर्कमा बस्दै आएका २२ बर्षीय युवा अमन खान सकुशल भेटिएका छन् । उनी न्युजर्सीमा फेला परेको प्रहरीले उनी निकटका व्यक्तिलाई जानकारी दिएको थियो ।
उनले आफू मेरिल्याण्डमा आइसकेपछि लुटिएको र लुटेराहरुले मोबाइल, झोला लगायतका सबै सामानहरु लुटेकाले कसैलाई सम्पर्क गर्न नपाएको बताएको मेरिल्याण्डबाट धन थापाले जानकारी दिए ।
कसैको पनि नम्बर याद नभएकाले कसैलाई सम्पर्क गर्न नसकेको र पछि प्रहरीको सम्पर्कमा पुगेपछि एलियन नम्बर बताउँदा प्रहरीको त्यसको माध्यमबाट स्पोन्सरको सम्पर्क नम्बर फेला पारेपछि सम्पर्क हुन सकेको उनले जानकारी दिए ।
आफू लुटिएपछि सार्वजनिक बसहरु चढ्दै र हिड्दै उनी न्युजर्सीको इष्ट विन्डसर पुगेको बताएका थिए । पर्वतको कुश्मा नगरपालिका वडा नम्बर ५ वडगाउँ शिवालयका २२ बर्षिय खान अप्रिल २७ शनिबारविहानदेखि सम्पर्कविहिन भएका थिए ।
झण्डै डेढ बर्ष अगाडि अमेरिका आएका अमन खान न्युयोर्कमा बस्दै आएका थिए । उनी बाल्टिमोरको रेष्टुरेण्टमा काम पाइएको भन्दै न्युयोर्कबाट अप्रिल २६ शुक्रबार राती बाल्टिमोरतिर हिडेका थिए । बुबालाई आफू विहान डिसी पुगेको बताएपछि उनी सम्पर्कविहीन भएका थिए ।
छोरा सम्पर्कविहीन भएपछि पर्वतको कुश्मामा रहेका अमनका बुवा अश्लम चिन्तित हुँदै खोजीका लागि सघाउन अमेरिकामा रहेको नेपाली समुदायलाई आग्रह गरेका थिए । त्यसपछि उनको मेरिल्याण्ड, वासिंटन डिसी लगायतका क्षेत्रमा खोजी गरिएको थियो ।
पछिल्लो २ महिना देखि अमन बिरामी रहेका थिए । २ छोरा र एक छोरी मध्ये जेठो छोरा अमन १६ महिना अघि टेक्सास हुदै अमेरिका प्रवेश गरेका थिए ।