लेबनानमा फ्रान्सका विदेशमन्त्री स्टेफन सेजर्नद्वारा इजराइलसँग शान्ति स्थापना गर्न जोड
प्रकाशित मिति : बैशाख १६, २०८१ आईतबार
LEBANON-FRANCE-POLITICS-DIPLOMACY
गाजा युद्धका कारण इजराइलसँगको सीमापार तनाव बढेपछि फ्रान्सका विदेशमन्त्री स्टेफन सेजर्नले आइतबार लेबनानको आफ्नो दोस्रो भ्रमणका क्रममा शान्त रहन आग्रह गर्नुभएको छ ।
अक्टोबर ७ मा दक्षिणी इजराइलमा हमासको अभूतपूर्व आक्रमणसँगै गाजामा युद्ध सुरु भएपछि इजराइल र लेबनानका इरान समर्थित हिजबुल्लाह समूहबीच दैनिक गोली हानाहान भइरहेको छ ।
इजराइलले लेबनानी क्षेत्रमा गहिरोसँग आक्रमण गरेपछि हालका साताहरूमा लडाइँ तीव्र भएको छ । हिजबुल्लाहले उत्तरी इजराइलमा सैन्य स्थानहरूमा आफ्नो मिसाइल र ड्रोन आक्रमणलाई तीव्र बनाएको छ ।
फ्रान्सले धेरै महिनादेखि सीमापार तनाव कम गर्ने प्रयास गरिरहेको छ र जनवरीमा लेबनान र इजराइल दुवैसामु शत्रुता अन्त्य गर्न पहल गरेको छ ।
दक्षिणी लेबनानमा संयुक्त राष्ट्रसङ्घको शान्ति मिसन ९युनिफिल० को मुख्यालयको भ्रमणका क्रममा विदेशमन्त्री सेजर्नले पेरिसले ‘लेबनानमा युद्धबाट बच्न’ प्रस्ताव गरिरहेको बताउनुभयो । “प्रस्ताव दिन राजनीतिक अधिकारीहरूसँग भेट्न म बेरुत जानेछु, हाम्रो जिम्मेबारी तनाव गर्नु हो र युनिफिलमा यो हाम्रो भूमिका पनि हो, हामीसँग यहाँ सात सय सैनिक छन्”, उहाँले भन्नुभयो ।
अप्रिल १३ पछि सीमापार आक्रमणको मात्रा दोब्बर भएको एक फ्रान्सेली कूटनीतिक स्रोतले बताएको छ । पत्रकार सम्मेलन आयोजना गर्नुअघि विदेशमन्त्री सेजर्नले आइतबार दिउँसो लेबनानी अधिकारीहरूसँग भेट गर्दै हुनुहुन्छ ।
दक्षिणी लेबनानमा लेबनानी सेना र युनिफलका अतिरिक्त कुनै पनि बलको उपस्थितिमाथि रोक लगाउने संयुक्त राष्ट्रसङ्घीय प्रस्तावमा आधारित फ्रान्सेली पहलप्रति बेरुतले मार्चमा आफ्नो प्रतिक्रिया प्रस्तुत गरेको थियो । कम शक्तिका साथ कामचलाउ सरकारको नेतृत्व गर्नुभएका लेबनानका प्रधानमन्त्री नजिब मिकातीले शुक्रबार आफ्नो प्रस्तावलाई पेरिसले समीक्षा गरिरहेको र बेरुतसामु नयाँ प्रस्ताव प्रस्तुत गर्ने बताउनुभएको थियो ।
गाजाका बारेमा शिखर सम्मेलनका लागि रियादमा रोकिनुहुने सेजर्नको भ्रमण अमेरिकी दूत अमोस होचस्टिनको जेरुसेलम भ्रमणसँग मेल खान्छ । वासिङ्टनले पनि इजराइल–लेबनान सीमामा तनाव कम गर्न जोड दिँदै आएको छ ।
गाजामा हुने युद्धविरामले मात्र इजराइलमाथिको आफ्नो आक्रमणलाई रोक्ने हिजबुल्लाहले बारम्बार घोषणा गर्दै आएको छ । अक्टोबर ८ पछि लेबनानमा कम्तीमा तीन सय ८५ जनाको मृत्यु भएको छ । तीमध्ये हिजबुल्लाहका दुई सय ५४ लडाकू र दर्जनौँ सर्वसाधारण रहेका छन् ।
इजराइलले आफ्नो सीमामा ११ सैनिक र नौ सर्वसाधारण मारिएको बताएको छ । दुवैतिर हजारौँ मानिस विस्थापित भएका छन् ।