Follow @khasokhasmag

नेपाली दूतावास अस्ट्रेलियाको महत्वकांक्षी योजना


प्रकाशित मिति : भाद्र १३, २०७४ मंगलबार

– नारायण खड्का

भाद्र १३, २०७४- यहाँ रहेको नेपाली दूतावासले यहाँका वाणिज्य दूतावासहरुसँगको सहकार्यमा नेपाल र नेपालीको हितमा गरिने विभिन्न महत्वकांक्षी योजनाहरु सार्वजनिक गरेको छ ।

नेपाली दूतावास क्यानबेरामा मंगलबार आयोजना गरिएको राजदुत र वाणिज्यदुतहरुसँगको परामर्श बैठकमा ‘नेपाल अस्ट्रेलिया ट्रेड तथा कमर्स टीम’स्थापना गर्ने लगायत निर्णय गरिएको छ । दूतावासद्वारा पठाइएको विज्ञप्तिमा उक्त टीमले नेपाल र अस्ट्रेलियाबीच व्यापार, वाणिज्य तथा लगानीको अवसरहरुको विस्तारका लागि महत्वपूर्ण भूमिका खेल्ने विश्वास लिइएको छ ।

यसै गरी विद्यार्थीहरुको हितका लागि कल्याणकारी कार्यक्रम ल्याउने, नेपालको उत्पादन र उद्योग तथा ब्यवसायको प्रवर्द्धन गर्न आर्थिक सम्मेलन गर्ने लगायतका महत्वकांक्षी योजना सार्वजनिक गरिएको छ । विज्ञप्तिमा जनाइए अनुसार नेपाल र अस्ट्रेलियाका सहरहरुका बीचमा भगिनी सम्बन्ध स्थापना गर्ने, सांस्कृतिक कार्यक्रमहरुको आदानप्रदानमार्फत द्िदेशीय सम्बन्धलाई अझ मजबुत बनाउन पहल गर्ने, गैरआवासीय नेपाली संघ (एनआरएन) तथा शैक्षिक परामर्शदाताहरुसँगको सहकार्यमा विद्यार्थी कल्याणकारी कोष स्थापना गर्ने लगायतका योजनाहरु छन् । यसै गरी, दुईदेशबीचमा उच्चस्तरीय राजनीतिक, शैक्षिक र व्यापारिक भ्रमणहरु आदानप्रदान गर्न समेत पहल गर्ने निर्णय गरिएको छ ।

‘हामीले आफ्नो तर्फबाट पहल गरियो भने नै सफलता पाइने हो । पहिलोपटक वाणिज्यदूतहरुसँगको छलफलपछि राजदूत लक्की शेर्पाले कान्तिपुरसँग भनिन् — ‘अस्ट्रेलियामा नेपालीहरुको जनसंख्या बढिरहेको सन्दर्भमा हामीले यी विषयहरुलाई प्राथमिकतामा राखेर काम गर्नुपर्छ भन्ने सोच हो ।’

राजदूत शेर्पाले नेपालको पहिचान अभिवृद्धि गर्ने र कार्यक्रमहरु ल्याउने कार्यमा वाणिज्य दूतावासहरुको महत्वपूर्ण भूमिका रहेको सुनाउँदै उनीहरुले अझ बढी योगदान दिनुपर्ने बताइन् ।

बैठकमा न्यु साउथ वेल्स र भिक्टोरियाका महावाणिज्यदूतहरु दीपक खडका र चन्द्र योञ्जन तथा दक्षिण अस्ट्रेलिया, वेस्टर्न अस्ट्रेलिया र क्युन्सल्यान्डका वाणिज्यदूतहरु क्रमश: दीपक धमला, फ्रेडरिक नील ब्राउन र जोसेफ एन्थोनी टुमाको सहभागिता रहेको थियो ।

 

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com