अमेरिकामा करछली गर्ने १ लाख २५ हजारको पिछा गर्दै आईआरएस, बाँकीलाई अर्को चरणमा
प्रकाशित मिति : फाल्गुन २०, २०८० आईतबार
अमेरिकामा आईआरएसले करछली गर्ने १ लाख २५ हजारको पिछा सुरु गरेको छ । २०१७ देखि २०२१ को बीचमा कर फाइल नगरेका १ लाख २५ हजारबारे यसैसाताबाट अनुसन्धान सुरु गरेको जनाइएको छ । उनीहरुले करोडौं डलर कर नतिरेको आईआरएसले जनाएको छ ।
यस हप्तादेखि आईआरएसले प्रति वर्ष १ मिलियन भन्दा बढी कमाउने २५ हजार भन्दा बढी मानिसहरू तथा ४ लाख डलरदेखि १ मिलियनडलर बीचको आम्दानी भएका १ लाख मानिसहरूलाई पत्रहरु पठाउन थाल्नेछ । उनीहरुले सन् २०१७ देखि २०२१ को बीचमा कर तिर्न असफल भएको जनाइएको छ ।
उच्च स्तरका कर छलीहरू पछ्याउन आईआरएसले गरिरहेको प्रयासको एक हिस्साका रुपमा यो अभियानलाई लिइएको छ । २०२२ मा पारित मुद्रास्फीति न्यूनीकरण ऐन मार्फत प्रदान गरिएको कोषद्वारा अनिवार्य गरिएको अडिट प्रकृया अन्तरगत यो अभियान सुरु गरिएको जनाइएको छ । यद्यपी ट्रेजरी सेक्रेटरीले आईआरएस नेतृत्वलाई ४ लाखभन्दा कम आम्दानी भएकाहरुलाई लेखा परीक्षा नबढाउन निर्देशन दिएकी थिइन् ।
ट्याक्स नतिर्नु अमेरिकाको कानून अन्तर्गत जिम्मेवारीपूर्वक आफ्नो नागरिक कर्तव्य पूरा गर्ने मेहनती करदाताहरूका लागि उचित नभएको आईआरएस आयुक्त डेनियल वेर्फेलले पत्रकारहरूलाई बताएका छन् । आफ्नो कर फाइल नगर्नेहरुले त्यसको परिणाम भोग्नुपर्ने उनले बताएका छन् । हालैका महिनाहरूमा आईआरएसले कर प्रणालीको दुरुपयोग गर्ने वा आफ्नो दायित्व रकम तिर्न असफल हुने उच्च धनी व्यक्तिहरूलाई लक्षित गरी नयाँ अभियानहरूको घोषणा गरेको छ ।
उदाहरणका लागि गत हप्ता आईआरएसले व्यवसायहरूको निजी जेटहरूमा दर्जनौं अडिटहरू सुरु गर्ने बताएको थियो । कसरी तिनीहरू व्यक्तिगत रूपमा कार्यकारीहरूद्वारा प्रयोग गरिन्छ र कर कटौतीको रूपमा लेखिएको भन्नेबारे अडिट सुरु गरिने आईआरएसले जनाएको छ । यस वर्षको सुरुमा आईआरएसले करछली गर्ने करोडपतिहरूबाट करिब आधा बिलियन डलर अत्यावश्यक कर संकलन गरेको बताएको थियो ।
उच्च आय भएका हजारौं व्यक्तिले अमेरिकामा धेरै वर्षदेखि ट्याक्स रिटर्न दाखिला नगरेपनि आईआरएसले उनीहरूलाई रकम तिराउनका लागि केही गर्न सकेन। तर त्यो अब परिवर्तन भइसकेको आईआरएसले घोषणा गरेको छ । ट्याक्स फाइल नगर्ने हजारौं मानिसहरूलाई पठाइने सूचना कर उठाउनको लागि पहिलो चरण हो। उनीहरुमध्ये केहीलाई पछि आपराधिक कर छलीका मुद्दाहरू लाग्ने देखिएको छ ।
आईआरएसले त्यसपछि अर्को चरणमा ट्याक्स फाइल नगर्ने सबै आय स्तरहरूका व्यक्तिलाई पत्र पठाउने जनाएको छ। ४ लाख डलरभन्दा कम कमाउने व्यक्तिहरूका लागि पत्रहरूले उनीहरूले रिफण्ड छुटाएको हुन सक्छ भन्ने तथ्यमा केन्द्रित हुनेछन्। १ मिलियन भन्दा बढी घरपरिवारहरूले वार्षिक रूपमा तिनीहरूले दाबी गर्न सक्ने क्रेडिटहरू गुमाउने गरेका छन् । उनीहरुले ट्याक्स फाइल नगरेका कारण अर्नड इन्कम ट्याक्स क्रेडिट लगायतका क्रेडिट गुमाउने गरेका छन् ।
